Груевски: Лотаријата со фискалните е добар проект, СДСМ претходно им ја укинаа наградата игра на луѓето

Добивај вести на Viber

Лотаријата со фискалните сметки е одличен проект, граѓаните ќе ја прифатат со задоволство и ќе му помогне и на стопанството. Ова е ставот на премиерот Никола Груевски, кој повтори дека лотаријата  стимулира и дава мотив затоа што плаќањето ДДВ ја сузбива нелегалната конкуренција. „На некој начин се знае дека се плаќа данокот и парите одат на вистинско место. Од тие пари подоцна се финансира образованието, здравството, инфраструктурата, патиштата… Така што мислам дека граѓаните со задоволство ќе го прифатат тоа“, нагласи Груевски. Тој топката повторно ја сврте кон опозициската СДСМ и потсети дека наградната игра за собирање фискални сметки била воведена уште во крајот на 2001 година и во текот на 2002 -ра. „Значи, луѓето си добиваа станови, дуќани, автомобили, добиваа работи за домаќинството – фрижидери, шпорети… и одеднаш дојде СДСМ, го укина тоа, бидејќи не требало тоа. Тоа си даваше свои резултати. Потоа мислевме дека ќе воведат нешто ново. Еве сега зборуваат дека ќе воведеле враќање на ДДВ. Имаа шанса да воведат кога ги укинаа наградните игри, но не воведоа. Не знам како очекуваат луѓето да им веруваат дека ќе воведат сега бидејќи кога беа на власт не само што не воведоа враќање на ДДВ, туку и им ја укинаа наградата игра на луѓето“, истакна Груевски.