ГРУЕВСКИ МНОГУ МУ СЕ НАЛУТИ НА МАРТИН ПРОТОЃЕР ПО ДЕНЕШНОТО СВЕДОЧЕЊЕ - тој панично се обидувал да се спаси од прогонот, умилкувајќи се и покренувајќи недостоинствени иницијативи
Објавено во: Македонија 07 Декември, 2021
Поранешниот премиер Никола Груевски се огласи на фејсбук по денешното сведочење на Мартин Протоѓер, кој порано беше шеф на неговиот кабинет.
„Денес имаше нови сведочења и нови партиски мотивирани интерпретации на провладините медиуми, делумно и вадења од контекст, со наслови како да ги добиле од штабот на СДСМ.
Јасно е дека власта и обвинителството, она што не го добиле во судницата или не го обезбедиле како доказ, се обидуваат да го добијат како перцепција кај граѓаните, со помош на повеќе партиски диригирани медиуми, кои селективно пренесуваат, вадат од контекст, особено наслови, и прават сѐ да се создаде перцепција за нешто што не е така или не е кажано или докажано во судницата. Некои тоа го нарекуваат и медиумски линч“.
На овој начин Груевски ги коментира денешните сведочења за случајот „Плацеви на Водно“.
„Обвинителството нема апсолутно никаков доказ дека јас сум купил а подоцна и продал земјишта и сум купил станови за кои всушност постои писмен доказ дека се изнајмени. Ниту пак може да има доказ, бидејки такво нешто не се случило. Во една таква ситуација тие се обидуваат да дејствуваат со сведоци врз кои имаат начин како да извршат притисок и уцена за да го кажат она што ним, на ова партиско контролирано обвинителство им е потребно“, пишува Груевски и додава дека „ и тие луѓе се дел од политичкиот прогон на власта кон минатата власт, и тие се жртви на прогонот, и дека случаите за кои ги осомничуваат или теретат, или дури ги осудиле, се политички договорени и конструирани и немаат врска со реалноста“.
За сведочењето на Протогер, Груевски пишува дека „Оној дел од неговата изјава каде говори дека во некој момент сум му спомнал дека сум земал земјиште на Водно од 10.000и метри квадратни не само што е неточна, туку ценам дека е дел од притисокот и уцената кој врз него систематски се прави од страна на партиски контролираното обвинителство“.
Сведочењето на Гордана Јанкуловска Груевски го оцени како „сосема коректно“, бидејќи укажала дека тој никогаш не земал или побарал пари од партиската каса, во тие години кога таа е генерален секретар, од есента 2004 до средината на 2006 година.
„Тие мислат дека ако мене ме дискредитираат, народот повеќе ќе им верува и ќе ги подржува, што нема да се случи. Тие се една неспособна за работа криминална банда, која како никој досега во крајна мера ја злоупотребува политичката моќ која произлегува од власта и врши политички прогон, а истовремено прави огромен криминал на секој чекор, во секој миг и во несогледливи размери. Затоа и пропаѓаат. Поради неискреноста, предавствата на националните интереси, криминалот, корупцијата, неработењето и лажењето“, пишува Груевски.