Добивај вести на Viber
Хемиско оружје во Сирија го употребува тамошната вооружена опозиција, изјави шефот на иранската дипломатија Мохамад Џавад Зариф, пренесуваат западните медиуми. Според информациите со кои располага Иран, вели тој, употребата на хемиското оружје е дело на вооружените групации во Сирија. Зариф кој и самиот беше жртва на хемиско оружје во текот на ирачко-иранската војна до 1980-те, ја осуди употребата на оружјето за масовно уништување.
„Хемиското оружје сеуште е во рацете на екстремистите и терористите во Сирија, и тоа претставува закана, не само за Сирија", вели Зариф
Претходно Иран ја поздрави одлуката на Сирија за членство во Конвенцијата за забрана на хемиско оружје и побара и Израел да стане член на тој договор.
„Бараме од Советот за безбедност на ОН и меѓународната заедница да преземат сериозни мерки за да се принуди тој режим (Израел) да биде дел од конвенцијата за забрана на хемиско оружје“, изјави портпаролка на иранското МНР, Марзиех Афгам.
Американскиот претседател Барак Обама пак изрази задоволство од тоа што неговиот руски колега Владимир Путин го поттикнал својот „штитеник" сирискиот претседател Башар ал-Асад да го уништи своето хемиско оружје.
Во Интервју за ABC,тој вели дека меѓу него и Путин има големи несогласувања, но заедно работеле на важни прашања, како што е операцијата против тероризмот.
„Се се разгледува преку призмата на руско-американските односи. Овде не станува збор за тоа, туку се работи за гаранцијата дека најлошиот вид оружје нема да дојде во рацете на ниеден убивачки режим, ниту во рацете на некои членови на опозицијата, коишто се против САД, како што се и против Асад", рече Обама.
Во истото интервју тој посочи дека разменил преписка и со новиот ирански претседател Хасан Роухани и сака да го искористи потенцијалот и влијанието на Иран за стабилизирањето на ситуацијата во Сирија.