„Хотели Метропол“ дава најголеми плати од конкурентите на охридската ривиера
Објавено во: Економија 25 Септември, 2019
Просечната бруто плата по вработен во најголемите хотелиерско – угостителски фирми на охридско-струшката ривиера се движи од 393 до 540 евра
Најголемиот хотелски комплекс на охридската ривиера дава најголеми плати на своите вработени во споредба со конкурентите – големи и познати хотелиерско-угостителски компании во најголемиот македонски туристички центар на вода.
„Хотели Метропол“ лани вработувал 139 лица, а просечната месечна бруто плата изнесувала 540 евра, покажуваат официјалните податоци од финансиските извештаи одобрени од независната ревизија. Во конкуренција на големите хотелско-угостителски брендови на орхидско-струшката ривиера „Хотели Метропол“ дава најголеми плати на своите вработени.
Како што пишувавме оваа компанија која во свој состав ги има големите хотели „Метропол“, „Белви“ и „Турист“ лани направила вкупни приходи од продажба во износ од 3,18 милиони евра и тие се за 20 отсто повисоки од приходите од продажба во 2017 година.
Неговиот пандан на струшката ривиера „Инекс Дрим“ лани давал просечна бруто месечна плата во износ од 405 евра. Најголемиот и најпознат струшки хотел лани вработувал 106 лица. Неговиот приход од продажба лани изнесува 2,34 милиони евра и е повисок за 9 отсто во споредба со 2017 година. И двете компании лани имаат добивка по оданочување во износ од по половина милион евра.
„Охридтурист“, компанијата која е сопственик на охридскиот туристички симбол (кој не работи) хотелот „Палас“ лани ангажирала 53 вработени лица. Оваа компанија неколку години наназад ги издава под закуп хотелите „Десарет“ и „Орце Николов“, комплексот „Летница“, рестораните „Ориент“ и „Билјанини извори“ и автокампот „Љубаништа“. Лани просечната бруто плата по вработен била 460 евра месечно и оваа компанија е втора по висина на исплатена бруто плата по „Хотели Метропол“. Карактеристично е тоа што оваа компанија закуп на недвижности овозможува и ангажман на своите вработени на закупците на недвижниот имот. Лани приходите од закуп на објекти биле 400.000 евра, а за ангажман на вработените фактурирала и наплатила 182.000 евра од своите закупци.
Од големите и познати хотелски капацитети, барем за оние за кои се јавно достапни податоците, најмали плати дава најубавата охридска тераса т.е. хотелот „Инекс Горица“. Просечната бруто месечна плата изнесува 393 евра. Компанијата лани ангажирала вкупно 65 вработени лица. Лани „Инекс Горица“ кој го стопанисува и автокампот „Градиште“ имала приходи од 754.000 евра, а годината ја завршила со загуба од 78.000 евра.
Р.Ф.