Хрватска ги отвора вратите за сезонците, можете да заработите до 1.200 евра

Добивај вести на Viber

Хрватска и оваа година има потреба од сезонски работници, кои би се вклопиле во туризмот и угостителството.

Платите можат да достигнат и до 1.200 евра. Бараат келнери, готвачи, шанкери, бармени, собарки. Дел од македонските граѓани веќе имаат искуство со работа во Хрватска, и во текот на летото работат во оваа земја. Платите кои се нудат за сезонците се исти како и за домашните работници. Келнерите земаат од 750 до 1.200 евра, а готвачите од 800 до 1.200 евра. За ова лето Хрватите планираат дека летната сезона ќе трае 3 месеци, а дали ќе имаат гости во септември и октомври ќе зависи од епидемиолошката состојба.

„Доколку се работи за позиции како келнери, бармени, тогаш се пријавуваат  млади луѓе, но за собарки има и жени на возраст од 55 години кои аплицираат. На луѓето им е важна висината на платите, но голема улога играат и квалификациите кои ги поседуваат да можат да аплицираат за работа. Српско – хравтскиот јазик не е толку важен, колку што е важен англискиот за работа во Хрватска, затоа што таму сѐ повеќе има туристи од Германија, Италија, од скандинавските земји. Ги работиме Брач и Пореч, и еве 6 години имаме луѓе кои одат да работат во Хрватска“, објаснува Милан Џинлев од агенцијата „Приорити солуции за вработување“.

Првите групи работници од земјава во Хрватска ќе заминат кон крајот на мај или почетокот на јуни. 

„Едно лето имам работено во Хрватска во туристичкиот сектор и сум  задоволна. Бев ангажирана четири месеци, но тоа беше пред пандемијата и доколку имам прилика пак би отишла. Имам роднини во Хрватска и тие ми помогнаа околу пронаоѓање на работата“, вели млада девојка од Куманово.

Изминатите години беа пласирани информации дека на Хрватска во годините кои доаѓаат ќе ѝ требаат од 30.000 до 35.000 сезонци. Кандидатите кои имаат искуство во овој сектор, можат да аплицираат и за работа во Дубаи. Деновиве пак Црна Гора донесе одлука минималецот за странците и за домашните работници да биде ист, но македонските работници во оваа земја најчесто заминуваат преку посредници и лични контакти.

foto freepik