Добивај вести на Viber
Саудиска Арабија и Кувајт нема да го намалат производството на нафта и покрај невидениот пад на цените на овој енергенс во изминативе шест месеци за речици 50 отсто поради презаситеноста на глобалните резерви, пренесува „Танјуг“.
„Доколку земјите што не се членки на ОПЕК сакаат да го намалат производството, тоа е добредојдено да го направат. Ние тоа нема да го сториме, особено не Саудиска Арабија, изјави саудискиот министер за нафта Али ал Наими.
Ваквата одлука на Саудиска Арабија ја поддржа и Кувајт каде тамошниот министер за нафта, Али ал Омаир, истакна дека и оваа земја смета дека во моментов нема потреба од намалување на производството. Тој најави дека нема да има итен состанок поради новонастанатата состојба.
Претставниците на останатите земји членки на ОПЕК, Ирак и Обединетите Арапски Емирати, исто така ја отфрлија потребата од итен состанок на организацијата.
Министер за нафта на Ирак, Адел Абулмахди, изјави дека очекува цената на нафтата да се стабилизира на 60 долари за барел.
Сухаил ал Мазроеи, министер за енергетик на ОАЕ, изјави дека ОПЕК наскоро нема да преземе никакви чекори за стабилизирање на пазарот.
„Нема да се мешаме на пазарот и да преземеме нешто што ќе биде со краток рок“, изјави тој.