И ВО МАКЕДОНИЈА СЕ БАРААТ СЕЗОНЦИ: Eве каде и колку можете да заработите

Добивај вести на Viber

Во земјава се бараат сезонски работници за берба на јаболка, грозје, аронија и друго овошје, во Ресен, Преспа, Берово, Кавадарци,  а дневно може да се заработат по 700, 800 до 1000 денари.

Во ресенско – преспанскиот крај ќе бидат потребни над 1000 берачи на јаболка оваа есен, иако на три локации паѓаше град кој направи штети и уништи дел од родот.

„Во Преспа бербата почнува на 27 септември. Се бере до 1 ноември, четири или пет недели, но ако се погоди една недела да врне, тогаш се пролонгира. Сезонците заработуваат по 800, 900 до 1000 денари, а со газдите договараат дали ќе има оброк, или сместување. Имаме луѓе од Источна Македонија, кои се вработени од Кочани, Свети Николе и тие земаат одмор, доаѓаат овде и берат јаболка. Но, тоа не е организирано, туку е стихијно.  Доаѓаа и луѓе од Албанија, и Македонци и Албанци, но сега тие се заминати во Италија, Грција на работа и ги нема“- вели Љубе Пампулевски, претседател на Здружение на овоштари „Благој Котларовски“ од Ресен.

И во Берово производителите на аронија мака мачат да најдат работници.

„Се бараат многу работници, а нив ги наоѓаме многу тешко, но немаме избор. Ги плаќаме по килограм набрана аронија, при што има работници кои ќе наберат 100 килограми, но има и други кои ќе наберат 30 до 40 килограми. Работници наоѓаме од овде од градот, и од селата“- објаснува Мирјана Дудуковска од Берово.

Одгледувачите на грозје во Кавадарци со берба почнуваат при крајот на август или почетокот на септември.

„Колку работници ќе бидат потребни зависи од родот и од годината. Работници доаѓаат од Струмица, Гевгелија, од соседните општини, а дневницата е 1000 денари“- вели кавадарчанец.

Во земјава иако се ретки, сепак има и ниви кои се засадени со лаванда за чие жнеење исто се исплаќа дневница од 1000 денари. 

Но, сите забележуваат дека младите многу не сакаат да работат, а криза за работници има во повеќе региони.

И на Балканот скоро секаде се бараат работници, па така во Србија за берба на малини се исплаќаат дневници од 2000 динари, односно околу 1000 македонски денари. Во Црна Гора од берба на грозје може да се заработи 25 до 30 евра дневница.