И во време на пандемија се бара стан повеќе во Охрид

Добивај вести на Viber

Се зголемил интересот за купување на недвижнини во Охрид, иако сме во време на пандемија. 

Од агенцијата за недвижен имот Јурис од Охрид велат дека последната година за 30 отсто е зголемен интересот за купување на станови во Охрид. Најбарани се становите со површина од 40 до 50 квадрати. Купувачите најчесто се од Скопје, Битола, Прилеп. Ги купуваат становите со цел летото да имаат каде да престојуваат и да уживаат во убавините на градот. 

„За период од една година интересот за купување имоти во Охрид е зголемен. Луѓето најчесто бараат станови, а цената за квадрат се движи од 700 до 1.300 евра зависно од локацијата, односно цените на становите се од 35.000 до 60.000 евра. Куќи поретко се бараат затоа што за нив треба поголема инвестиција. И за викендици исто така нема некој особен интерес“, велат од агенцијата Јурис. 

Од агенцијата Евро недвижнини објаснуваат дека сега Охрид е атрактивен за купувачите, иако во градот нема хиперпродукција на станови. 

„Тоа е сплет на повеќе фактори зошто Охрид е интерсен за купување на станови. Цените се пониски од тие во Скопје, луѓето стануваат свесни за чиста средина каде нема индустрија. Најголем дел од купувачите се од Скопје, но тука сепак се создава една илузија затоа што во Скопје е пола Македонија. Има и купувачи од Тетово, Гостивар, Кичево, Дебар. Значи генерално имоти купуваат луѓето од западна Македонија, многу ретко од источна. Младите бараат нови станови, а постарите пак сакаат стара градба. Се бараат најчесто станови со површина од 40 до 50 квадрати, а многу поретко гарсоњери и големи станови“, додаваат од Евро недвижнини. 

Од агенцијата за недвижнини Камелија велат дека во Охрид моментално се бараат секакви станови. За купувачите важна е да се наоѓаат на убава локација, но пресуда е и цената. 

„Има многу поголема побарувачка од понудата на станови. Најчесто купуваат скопјани, претпоставувам поради мирот, го гледаат Охрид како место за релаксација покрај вода. За разлика од претходните години цените се повисоки“, наведуваат од Камелија. 

Во Охрид функционираат околу 15 агенции кои посредуваат за купување на недвижен имот.  Во Македонија пак, голем интерес за купување на станови има и во Скопје, и тоа претежно од луѓе од внатрешнста кои поради работа и подобри услови за живот се доселуваат во главниот град. 

foto freepik