Добивај вести на Viber
Заради технички инцидент денеска е исклучен реакторот на нуклеарната централа Запорошкаја во југоисточна Украина, објавија украинските власти.
Централата престанала да произведува струја, но поголема опасност нема затоа што реакторите не се загрозени, уверува украинскиот министер за енергетика Володимир Демчишин.
Сепак, украинскиот премиер Арсениј Јаценјук за инцидентот побарал детална информација од надлежните. Нуклеарната централа треба да продолжи со работа на 5-ти декември. Според објаснувањето на украинските власти, техничкиот проблем се случил со системот за пренос на електрична енергија, а не во самите реактори.
Инцидентот се случил уште во петокот, но јавноста во Украина за тоа дознала дури денеска, откако Јаценјук побарал извештај од министерот за енергетика за проблемите во работата на централата. Ова уште повеќе ги подгреа шпекулациите дека може да се работи за посериозен инцидент.
Вознемиреноста за нуклеарната безбедност на украинските граѓани е голема, бидејќи земјата и денес се бори со последиците од катастрофата во централата Чернобил, која се случи во 1986 година.