Историска промена: Милионерите од Британија и Франција се селат во балканска земја

Добивај вести на Viber

Меѓу најбогатите луѓе во светот се случува историска промена. Оваа година, 142 илјади милионери имаат намера да се преселат, оставајќи ги зад себе луксузните станови во Лондон или имотите во Франција.

Швајцарија, Соединетите Американски Држави(САД) и Обединетите Арапски Емирати(ОАЕ) сè уште успеваат да привлечат дел од богатите, но Црна Гора е најбрзо растечкиот центар во светот за милионери.

Имено, според податоците од швајцарската компанија „Хенли и партнерс“, во текот на минатата година бројот на милионери кои дошле да живеат во оваа земја се зголемил за дури 124 проценти.

Моментално, во оваа земја живеат 2.800 милионери, што е значително помалку во споредба со некои други земји. Сепак, таа ги привлекува богатите благодарение на програмата „инвестиции во замена за државјанство“, позната и како Златен пасош.

Дополнително, како што истакна Доминик Волек од „Хенли и партнерс“, Црна Гора станува привлечна поради близината до Западна Европа и нејзината фискална флексибилност.

„Ниските даноци на Црна Гора, со фиксен данок на доход и без данок на наследство или подарок, ја направија особено привлечна за зачувување на богатството. Во комбинација со јадранскиот брег, понудата на луксузни недвижности и атрактивниот медитерански начин на живот, земјата стана избор на инвеститорите“, рече Волек.

Покрај претходно споменатите, бројот на богати луѓе кои емигрирале минатата година се зголемил и во Малта, Полска, Кина, Костарика, Индија и Латвија.

Од друга страна, повеќето милионери емигрирале од Велика Британија, Кина, Индија, Јужна Кореја, Русија, Бразил, Франција, Шпанија и Германија, пишува бизнис весникот „Форчун“.

foto Wikipedia/Marcin Konsek