Добивај вести на Viber
Генерален штрајк од утрово ја парализира Италија - вработените во администрацијата, болниците, училиштата и сообраќајот на осум часа ја прекинаа работата во знак на протест против најавените мерки за штедење.
Протестите против економската политика на Владата на Матео Ренци ги покренаа два синдикати, а демонстрации се одржуваат во 54 градови низ Италија.
Се очекува протестот да предизвика најголем застој во железничкиот и авио сообраќајот, бидејќи за врее на штрајкот се изведуваат само минимален број услуги.
„Вака веќе не оди“, порачуваат работниците низ цела Италија, кои се особено незадоволни со најавените измени во Законот за труд, со кои се овозможува полесно отпуштање од работа.
Со измените се предвидува намалување на правата и заштитата на работниците. Во исто време, се предвидува и помала обврска за отпремнини за фирмите кои вработуваат млади луѓе на неопределено време.
Според Ренци, целта на оваа мерка е да се стимулира вработувањето на младите, со оглед на тоа што досега италијанските компании најчесто вработувале млади на една година, а вработените немале сигурност.
Синдикатите имаат големи забелешки и на предлог-буџетот за 2015 година, оценувајќи дека мерките за економски раст на земјата се недоволни.