Израелските напади врз Иран ги вивнаа цените на златото

Добивај вести на Viber

Цените на златото нагло се зголемија бидејќи инвеститорите се загрижени за израелските напади врз Иран, што предизвика пораст на побарувачката за средства кои се сметаат за безбедни.

На физичкиот пазар, унца злато се тргуваше по 3.423,46 долари утрово, што е за 1,2 проценти повеќе од вчерашното затворање. Поскапе за повеќе од 3,5 проценти од почетокот на неделата. На американскиот пазар, фјучерсите за злато се тргуваа за 1,2 проценти повеќе, на 3.444,10 долари.

Израел нападна нуклеарни постројки и фабрики за балистички ракети во Иран рано утрово, тврдејќи дека ја спречува иранската програма за нуклеарно оружје.

Техеран постојано нагласува дека неговата нуклеарна програма е исклучиво цивилна по природа и одговори со испраќање околу 100 беспилотни летала кон израелска територија.

„Нападите во моментов поддржуваат бран на купување на пазарот на злато... но е прерано да се процени дали шокот ќе ги покачи цените повисоко во подолг временски период, бидејќи ситуацијата брзо се менува“, рече аналитичарот на „Џулиус Баер“, Карстен Менке.

Реакцијата (цената) на златото би можела да се продолжи подолг временски период во случај на прекини во снабдувањето со нафта, без разлика дали тоа ќе се случи поради директни напади или индиректни политички мерки. 

Долгорочен поттик на цените на нафтата би бил и ширењето на конфликтот во други земји во регионот на Блискиот Исток.

Инвеститорите обично купуваат злато во периоди на геополитички и економски тензии.

Цената на унца сребро беше стабилна на физичкиот пазар на 36,36 долари. Паладиумот поскапе за 0,5 проценти на 1.061,06 долари. Платината се тргуваше по цена пониска за 1,5 проценти, на 1.274,30 долари.