Јован Деспотовски отвора фабрика за водород во земјава, ќе добие 5 отсто од сопствеништвото

Добивај вести на Viber

Британската Hydrogen Utopia International PLC ќе гради фабрика за производство на енергетско гориво водород од нерециклирачки мешан отпад од пластика, а регионалните бизнис медиуми пред неколку дена објавија дека нејзината подружница, HUI2021 International UK Limited склучила договор за услуги и менаџирање со ТФ Капитал.

Инаку ТФ Капитал е фирма од неодамна основана од Јован Деспотовски, поранешниот директор на Дирекцијата за технолошко индустриски развојни зони и кандидат за претседател на СДСМ.

На водородот енергетичарите гледаат како на перспективно алтернативно гориво чија продажба допрва треба да се зголемува со развојот на потребната инфраструктура, а најголемата примена се очекува да ја најде во автомобилската индустрија и во производството на електричната енергија.

„ТФ Капитал има задача да го трасира патот за добивање дозволи и лиценци, да спроведе физибилити студии за различни потенцијални локации во Северна Македонија, да развие сеопфатен бизнис план, финансиски модел и стратегија за влез на пазарот. Дополнително, се очекува ТФ Капитал да ги идентификува потенцијалните клиенти и инвеститори, вклучително и воспоставување владини партнерства, да подготви извештај за обезбедување државна помош и субвенции и да управува со целокупното извршување на проектот“, објави Hydrogen Utopia International

За возврат, HUI ќе му плаќа месечен надомест  од 5.000 евра на новоформираната фирма на Деспотовски во наредните 18 месеци, или до добивањето на градежната дозвола, а ТФ Капитал ќе добие и 5 отсто од сопствеништвото над новоизградената фабрика како домашен бизнис субјект.

Како што е најавено, HUI има за цел да стане една од водечките нови европски компании специјализирани за претворање во гориво без јаглерод на мешаната пластика што не може да се рециклира. Планот е приходите да се собираат од разни извори, а ќе се дефинира и тоа како ќе се плаќа откупот на отпадот како суровина.

Деспотовски е сопственик и главен извршен директор на ТФ Капитал, основана во септември. Претходно тој сам поднесе оставка како директор на Дирекцијата за ТИРЗ , не чекајќи да биде заменет со нов функционер од новата власт. По нешто повеќе од два месеци од оставката, стана сопственик на претпријатието за „управувачки дејности“. 

А.К.