Јовески: Во моментов се уште нема докази за бегството на Груевски

Добивај вести на Viber

Една година по бегството на поранешниот македонски премиер Никола Груевски во Будимпешта, републичкиот јавен обвинител Љубомир Јовески вели дека и натаму нема конкретни докази за начинот на бегство на осудениот на двегодишна казна затвор во случајот „Тенк“, ниту пак за тоа кој му помогнал во бегството.

-Обвинителството собра повеќе материјални и вербални докази. За жал, до дел од доказите не можевме да дојдеме поради одговорот од страна на надлежните органи од Албанија. Се работи на предметот, но до овој момент нема конкретни докази за начинот на бегство на осудениот Груевски, ниту кој му помогнал во бегството. Постапката се води за да се утврди евентуална кривична одговорност на определени лица инволвирани во бегството. Пропустите во работењето на институциите не се во надлежност на Јавното обвинителство и секоја институција треба да ги утврди и да преземе мерки за нивно отстранување, вели Јовески во интервјуто за „Независен“.

Покрај тоа што не постојат услови да биде верификувана истрагата во обвинение, истовремено во моментов од „Интерпол“ не е ниту објавена потерницата за Груевски за случајот „27 април“.

- Официјален одговор нема, иако е побаран од страна на Основното јавно обвинителство за гонење на организиран криминал и корупција. Од наша страна се преземени сите потребни дејствија согласно со меѓународната процедура и до тука се нашите ингеренции, додаде Јовески.