„Јужен поток“ ја заобиколи- Хрватска жали

Добивај вести на Viber

Претседателот на Хрватска  Иво Јосиповиќ изјави денеска дека одлуката на руската компанија „Газпром“ трасата на гасоводот „Јужен поток“ да ја заобиколи Хрватска е лоша вест и резултат на долгогодишната несистематска политика во стопанството. Претходникот на Јосиповиќ Стипе Месиќ, кој за „Јужен поток“ исто така  преговараше со рускиот претседател Владимир Путин  и истакна дека со оваа одлука Хрватска многу губи, односно гас кој директно би го добивала и стотини милиони евра за транзит. - Тоа е лоша вест и резултат на фактот дека со години немаме систематска политика во стопанството, дека не ја планираме иднината и фактот дека во однос не некои руски инвеститори направивме некоректни потези. Се надевам дека ова ќе ни биде повод да се промениме, изјави Јосиповиќ. Месиќ истакна дека е нормално гасоводот да минувал преку Хрватска, бидејќи се движи по коридорот по кој е и хрватскиот нафтовод. - Владата беше против, а не разбирам зошто, изјави Месиќ, кој се сомнева дека е можно што било да се поправи. Потпретседателот на „Газпром“ Алексадар Медведев потврди дека гасоводот „Јужен поток“ ќе минува низ Унгарија. – Можноста еден крак од него да минува низ Хрватска целосно е отфрлена, а одлуката за изградба низ Унгарија е конечна, истакна Медведев за време на потпишувањето на договорот со Унгарија. Гасоводот од Србија, која со „Газпром“ договорот го потпиша на почетокот на неделата, кај Суботица ќе навлезе во Унгарија. Трасата на „Јужен поток“ е од Црното Море преку Бугарија, Србија и Унгарија, од каде еден крак би одел кон Австрија, а друг кон северна Италија. Изградбата на „Јужен поток“ ќе чини околу 15 милијарди евра, а планирано е да биде пуштен во употреба во 2015 година. Во јужна Европа од Русија преку гасоводот годишно ќе се извезуваат 63 милијарди кубни метри гас.