„Јужен тек“ ја одмина Грција

Добивај вести на Viber

Рускиот енергетски гигант Газпром соопшти дека Грција е отстранета од плановите за изградба на гасоводот „Јужен тек“, кој треба да почне со испорака на гас кон Западна Европа во 2015 година, објави електронското издание на грчкиот весник Катимерини. Високи претставници на Гаспром на прес-конференција во Москва рекле дека ваквата одлука се должи на фактот што побарувачката на грчкиот пазар не може да ја покрие вредноста на инвестицијата. Бугарија пак треба да потпише за „Јужен тек“ во четврток, кога таму ќе пристигне директорот на Гаспром, Алексеј Милер. „Нема да градиме гасовод, кој ќе стои празен“, истакна Леонид Чугунов, шеф на одделот за управување со проекти во Газпром. Тој рече дека неговата компанија се откажала во блиска иднина од плановите да изгради јужен дел на гасоводот, кој ќе стигне до јужна Италија преку Грција, истакнувајќи дека нивниот проект е насочен само кон пазарите кои се способни да понудат можности за поголема потрошувачка . Според него, ова не е случај ниту со Грција ниту со јужна Италија. Ако Грција има потреба од повеќе гас, тој ќе дојде преку Бугарија и Турција, појаснува Чугунов. Претседателот на Гаспром Алексеј Милер вчера потврди дека изградбата на „Јужен тек“ се очекува да започне до крајот на годината. Плановите за грчкиот огранок „Јужен тек“ дојдоа како резултат на особено добрите однос меѓу Атина и Москва, посебно за време на мандатот на поранешниот премиер Костас Караманлис и беа поврзани со позитивниот став на неговата влада кон рускиот проект за нафтоводот Бургас-Александрополис. Како што оценува весникот Катимерини, уште тогаш било јасно дека грчкиот дел на „Јужен тек“ нема да се базира на финансиски критериуми. Извори од енергетскиот сектор појаснуваат дека сепак, поради интересот на Газпром за грчкиот пазар на гас, останува отворена можноста за дополнително враќање на Грција во плановите за „Јужен тек“, пишува грчкиот весник.