КАЈ НЕ ПОМАГААТ УШТЕ И СЕ СИТАТ: Петти ден агонија на поплавените!

Добивај вести на Viber

Петти ден агонија на жителите од најпогодените места во скопскиот регион кои ги зафати катастрофалната поплава која однесе човечки животи и направи сериозни материјални штети.    Велат хуманитарна помош во храна и вода има во изобилие, но недостасуваат хигиенски и средства за дезинфекција, бидејќи често се случува при расчистувањето да се повредат. Вода и струја сеуште нема во повеќето куќи. Стравуваат  поради влагата која се шири низ ѕидовите. Па за маката да е уште поголема, реагираат најпогодените, гумените чизми без кои е невозможно да се пристапи до куќите деновиве биле двојно и тројно поскапени во земјоделските аптеки и продавниците. “Срамно е ова што се случува. Ај што ни се случи оваа катастрофа па на маката сега некој гледа да ќари денар. Ако чизмите беа 400 или 500 денари, незнам, сега по 1200 и повеќе се продаваат. Имам роднини кои дојдоа да помогнат, немаат чизми. Моравме да купиме, немам што да им дадам од стари кондури, подрумот цел ми е под вода. Црпиме со раце, со кофи. Се срамам што на вакви моменти се покажуваме како нелуѓе”- реагира жител на Стајковци. Досега вели помош нема добиено. Неколкупати поминале војници и екипи на патишта ама директна помош нема. Се снаоѓа кој како знае и умее. “Ни рекоа првиот ден оставете се како што е, ќе се санира. И оставивме. Чекавме ама никој немаше.Неможеме во кал да седиме. Од утро до вечер расчистуваме ама сами тешко се постигнува. Гаражата неможам да ја препознаам. Плива во вода.Немам време ниту до пунктот да стигнам за да земам хуманитарна помош, а гледам соседи кои не се поплавени по трипати одат за храна, вода, други средства. Неможам да ја опишам разочараноста и револтот, што од оваа катастрофа што не снајде, што од неажурноста за помош, што од нечовечноста”- додава револтираниот жител на Стајковци, кој инсистираше на анонимност. Глетката  на терен сеуште е страотна, а поради високите температури се шири и непријатна миризба. Во невремето во Стајковци  први на удар биле улиците кои се паралелни со автопатот. Подрумите, гаражите и првите спратови на куќите  се целосно поплавени, оградите рушени, покуќнината и мебелот уништени. Дворовите се полни со кал и вода, па тешко може да се препознае дека некогаш  биле урбано уредени катчиња. Освен  по некоја расфрлана или искршена жардињера или саксија друго нема. “Изјавите кои стигнуваат дека Стајковци доживеало поплава, слободно можам да кажам дека беше цунами. Се се случи во тие три часа, нема река или езеро во близина, обилни дождови имало и порано  но вакво нешто не е запаметено. Непредвидливо, луѓето не знаеја како да реагираат, буквално доживеаа шок. Посебно овие три четири улици кои се паралелни со автопатот во должина од еден километар се први на удар и беа најпогодени. Срушени се сите огради, уништени се сите возила, подрумите и првиот спрат е поплавен и сто посто се уништени. Најголемиот товар е на семејствата и нивните роднини.Благодарни сме на сите кои доаѓаат да помогнат, но бавно течат работите”- вели Дејанчо Алексовски. На терен се екипи на хуманитарни организации, јавни претпријатија, војска, хумани граѓани, активисти. Но координацијата според Алексовски  е најголем проблем. Редоследот на помош вели треба да биде координиран за да се постигнат поголеми ефекти. “Треба механизација која може да работи во блато за да се извади овој отпад. Има мали скипчиња и други багери се за сув терен, но мора да се извади отпадот, покуќнината, се е уништено. Многу е важно има затрупано птици животни, се чувствува реа, температурите се високи, постои опасност од зарази. Затоа велам тоа координатовно тело треба да делува активно, багерите доаѓаат сега овде, па за еден час во друга куќа, па потоа на следна. Така не се работи. Треба да се направи системски распоред инаку ништо не сме направиле”- објаснува Алексовски. Жителите во најпогодените реони во скопско мака мачат со санирање на штетите и се борат да го вратат својот живот во нормала. Велат почнуваат нов живот, од нула.  Ќе биде потребно многу време за повторно да ги адаптираат своите куќи во вистински дом за живеење,  но велат нема време што ќе ги избрише трагите од стравот и сеќавањата на страотната поплава која за неколку часа ги смени нивните животи. С.Б.