Како Црна Гора стана најбрзорастечкиот центар на милионери во светот?

Добивај вести на Viber

„Сместена помеѓу синото Јадранско Море и моќните Динарски Алпи, Црна Гора забележа раст на милионерската популација за 124 проценти во текот на изминатата деценија, според Извештајот за миграција на приватно богатство на Хенли за 2025 година. Земјата стана најбрзорастечкиот центар на милионери во светот“, пишува списанието Fortune.

Црногорскиот премиер Милојко Спајиќ тврди дека растот не е случајност или резултат на убавото време, како што изјави на Глобалниот форум на Fortune во Ријад.

„Ние сме многу посветени на идејата да ги донесеме најпаметните и најталентираните луѓе во светот во Црна Гора“, рече 37-годишниот лидер, додавајќи дека ниските даноци се клучна причина за приливот на ултрабогати жители.

Едноставно е

„Нашата даночна политика е многу едноставна“, објасни тој. „Веруваме дека луѓето што инвестираат во Црна Гора, без разлика дали се инвеститори, вработени, работници или менаџери, сите оние што го поврзуваат својот успех со успехот на Црна Гора, заслужуваат даночни олеснувања.“

Црна Гора има една од најниските стапки на данок на доход и добивка во Европа, која се движи од 9 до 15 проценти.

Граѓаните не плаќаат ништо до приход од 700 евра, плаќаат 9 проценти за заработка помеѓу 701 и 1.000 евра и само 15 проценти за делот од бруто заработката над 1.000 евра. За споредба, највисоката стапка на данок на доход во Швајцарија достигнува околу 40 проценти, според Fortune.

Според Спајиќ, Црна Гора наскоро ќе има најниска стапка на данок на добивка во Европа.

„Работодавците исто така имаат најниски даноци и придонеси за вработените во Европа“, додаде тој. „Причината за ова е едноставна - сакаме луѓето што доаѓаат во Црна Гора и ја врзуваат својата судбина за нашата земја да се чувствуваат наградени.“

Fortune исто така наведува дека покрај даночните олеснувања, Спајиќ истакнал и монетарна предност: црногорската економија работи според модел сличен на златниот стандард.

„Друга интересна работа за инвеститорите е тоа што живееме во еден вид квази-златен стандард. За нас, еврото е како злато - за да го стекнеме, мора да продадеме реални средства, стоки или услуги. Значи, вредноста на нашите средства е реална, а не зголемена од старите програми за квантитативно олеснување.“

„Затоа Црна Гора е фер и разумно вреднувана инвестициска дестинација“, заклучи премиерот, како што објави Fortune.

Глобална миграција на богатството

Според податоците од Извештајот за миграција на приватното богатство на Хенли, милионерите ширум светот сè повеќе го преместуваат својот капитал во побезбедни средини поради војни, трговски тензии и глобални кризи.

Во 2025 година, 142.000 милионери ја промениле својата земја на живеење, додека во 2026 година се очекува тоа да го сторат околу 165.000.

Топ 5 најбрзо растечки „милионерски центри“ (2014–2024):

Црна Гора – раст од 124 проценти

Обединети Арапски Емирати – 98 проценти

Малта – 87 проценти

Полска – 82 проценти

САД – 78 проценти

„Системот со ниски даноци на Црна Гора, без данок на наследство и подарок, ја прави исклучително привлечна за зачувување на богатството“, изјави Доминик Волек од „Хенли и партнерс“ за списанието „Форчун“.

„Во комбинација со нејзиното јадранско крајбрежје, луксузни недвижности и атрактивен медитерански начин на живот, земјата стана идеална дестинација за инвеститорите кои бараат квалитетен живот.“

За да стане даночен жител на Црна Гора, некој треба да помине повеќе од 183 дена во годината во земјата.

Премиерот кој симболизира нова ера за Црна Гора

Исто како и земјата што ја води, Милојко Спајиќ е пример за млад успех и модерно лидерство – тој е еден од најмладите државници во светот.

„Форчун“ исто така додава дека Спајиќ, пред да влезе во политиката, изградил кариера во финансиите: работел како кредитен аналитичар во „Голдман Сакс“, а подоцна станал партнер во фонд за ризичен капитал во Сингапур. Тој се приклучил на црногорската влада во 2020 година како министер за финансии и социјална помош, а во октомври 2023 година бил избран за премиер.

„До 2025 година, Спајиќ ќе биде четвртиот најмлад лидер во светот, по Ибрахим Траоре (Буркина Фасо), Даниел Нобоа (Еквадор) и Криструн Фростадотир (Исланд), според списанието „Форчун“.