Како Германија ќе се ослободи од џихадистите?
Објавено во: Свет 09 Април, 2018
Германската Влада ќе донесе закон кој ќе им овозможи да им го одземат германското државјанство на исламистите опасни за уставниот поредок.
„Планираме да донесеме закон кој ќе овозможи на џихадисти кои имаат двојно државјанство да им се одземе германското“, за медиумите изјави Стефан Мејер државниот секретар во Министерството за внатрешни работи, пренесе Дојче веле.
Мејер додаде дека очекува законот да биде донесен до крајот на оваа година.
И досега имало предлози за на сите оние кои учествувале во борбите на страната на исламистите во Сирија и Ирак да им се одземе германското државјанство, но ова е прва конкретна најава за измени во законот што тоа би го овозможил.
Како што е наведено, оваа иницијатива потекнува од новиот министер за внатрешни работи, Хорст Шихофер кој веднаш по пристигнувањето на оваа позиција најави остри мерки против исламистите.
Шихофер најави дека би сакал да ја прошири листата на земји што се означени како безбедни земји, што ќе им овозможи полесно протерување. Покрај Мароко, Тунис и Алжир, Шихофер листата сака да ја прошири и со Ерменија и Грузија.