Како граѓаните гледаат на корупцијата и дали даваат мито?

Добивај вести на Viber

Секој трет граѓанин примил поткуп, а дури 85% од граѓаните дале пари на полицаец за да не им биде одземена возачката дозвола, покажува  истражувањето на Македонскиот центар за меѓународна соработка (МЦМС).

Најкорумпирани се судиите, министрите, лидерите на политичките партии, а по нив се пратениците, цариниците, јавните обвинители и други, сметаат граѓаните.

Според истражувањето,  46% од граѓаните мислат дека државните службеници се вмешани во корупција, а исто толку се убедени дека таа тешко ќе се искорени. Само 7,4% од граѓаните ја пријавуваат корупцијата, иако две третини од нив се свесни за неа.

Корупцијата во Македонија ја поддржуваат и младите. Дури 47% од анкетираните на возраст меѓу 18 и 29 години сметаат дека корупцијата е прифатлива, а слично размислуваат и постарите меѓу 40 и 49 години.

Корупцијата е огромна, но таа не е најголемиот проблем на граѓаните. На прво место останува сиромаштијата.

„Сепак, корупцијата за граѓаните не претставува најголем проблем. Први се економските проблеми, додека корупцијата е на петто место“– вели Ерина Нурединовска од МЦМС.

Истражувањето на МЦМС е направено со 1000 испитаници од 27 јануари до 3 февруари годинава.