Како се зголемува интензитетот на популистичките политики, така капиталните расходи се намалуваат

Добивај вести на Viber

Во јуни преку ставката капитални трошоци се потрошиле 14,2 милиони евра, што од почетокот на годината, заедно со јануари, јуни е еден од послабите инвестициски месеци. Според податоците од месечниот Извештај за реализација на Буџетот, првата половина од годинава заврши со реализација на капиталните расходи на ниво од 99,8 милиони евра, што претставува само 27,2% во однос на проекцијата зацртана во ребалансот на Буџетот 2016 година.

Капитални расходи, Буџет 2016

Јануари-јуни          99 853 658 евра

Проекција 2016    366 666 666 евра

Реализација                      27,2%

За оваа слаба реализација на капиталните расходи, кои се носечки за развојната компонента на Буџетот, според креаторот на економските политики, виновна е политичката криза.

“Капиталните расходи во период јануари-јуни 2016 година се реализираа во износ од 6.141 милиони денари. Во овој период од годината послабата реализација на капиталните расходи воглавно се должи на законските ограничувања кои постојат во предизборни периоди. Во рамките на реализираните средства навремено се исплаќаа доспеаните обврски за сите инфраструктурни проекти, како доизградбата на автопатот-Коридор 10, инвестиции во реконструкција и доизградба на железничката инфраструктура, проекти за подобрување на инфраструктурата во образованието, здравството, комуналната инфраструктура, преку изградба на училишта, спортски сали, 7 игралишта, водоводи и канализации, како и реконструкција на здравствени објекти“ – се наведува во Ребаланс на Буџетот 2016 година.

Со усвоениот ребаланс на Буџетот, Владата посегна по кратење токму кај оваа ставка, додека од друга страна ги зголеми расходите за социјални транфери и за плати и надместоци, а се зголеми и ставката за отплата на камати по основ на долгови.

Со ребалансираниот Буџет, Владата најави повлекување на кредитни средства за исплата на обврски произлезени од изградбата на Коридорот 10 па така, во буџетот се наведува:

“Обезбедување на дополнително повлекување на кредитните средства за навремена исплата на обврските кои произлегуваат од интензивната градба на Коридорот 10“.

Повеќе пари ќе има за проектот гасификација, но во исто време ги намали средствата на пример за изградба на хидросистемот Злетовица, потоа намалување има и кај капиталната ставка “Инвестиции во железничката инфраструктура“, за Слободните економски зони, за изградба на дел претходно планираните водоводни и канализациони мрежи како и за за реконструкција и доградба на објекти на Јавните здравствени установи.

Со ребаланс на Буџетот, годинава капиталните раходи се намалија на 366,6 милиони евра. Во  првичниот Буџет,  оваа ставка беше позиционирана на 412,1 милион евра и во однос на оваа проекција, реализацијата на капиталните расходи заклучно со првата половина од годинава изнесуваат 24,2%.