Како „Усје“ ја зацементира короната? Со исти приходи профитот порасна 20 отсто!

Добивај вести на Viber

Цементарница „Усје“ е исклучок од правилото за негативното влијание на корона кризата врз бизнисот. Друштвото лани направило профит од 24,7 милиони евра и тоа е за 20 отсто подобар резултат на приходи кои се исти како и во 2019 година. Цементарница лани имаше извоз на девизи во форма на дивиденда во вредност од речиси 40 милиони евра

Скопската цементарница „Усје“ ланската година ја заврши со профит од 24,75 милиони евра, резултат што е за 20 отсто подобар во споредба со 2019 година, покажуваат официјалните резултати од консолидираниот биланс на успех на оваа голема компанија. Цементарница лани обезбедила раст на профитот со приходи кои биле исти како во 2019 година и изнесуваат 78,85 милиони евра.

Цементарницата лани не почувствувала негативно влијание од корона кризата. Приходите од продажба се за 1 отсто повисоки одо претходната споредбена година. Во нивната структура лани доминираат домашните приходи со 53,37милиони евра. Тоа е за 4 отсто поголема продажба во однос на 2019 година. Извозот на цементарницата „Усје“ изнесува 25,48 милиони евра и тоа е за 4 отсто помалку од претходната година.

Оперативните расходи на друштвото изнесуваат 55,6 милиони евра и се за 6 отсто пониски од 2019 година. Најголема расходна ставка логично се трошоците за суровини и други материјали кои се пониски за 12 отсто и изнесуваат 24 милиони евра. Трошоците за вработените се околу 5 милиони евра, а услугите со карактер на материјални трошоци надминуваат 11 милиони евра.

Оперативната добивка на друштвото е 27,2 милиони евра и е за 21 отсто повисока од претходната година.

Од билансот на состојба за истакнување е тоа што обврските на друштвото лани пораснале за 44 отсто во споредба со 2019 година и изнесуваат 17,4 милиони евра. Најзначаен раст има кај обврските спрема добавувачите кои се зголемени за 55 отсто до износ од 11 милиони евра. За истакнување е тоа што „Усје“ нема кредитни обврски.