Караџовски: Фрапиран сум од „самонаречните“ новинари, нема подобни и неподобни судии
Објавено во: Македонија 22 Февруари, 2017
Претседателот на Судскиот совет, Зоран Караџовски, негодува на начинот на кој дел од медиумите ја пренеле информацијата за прераспределбата на голем број на судии во Кривичниот совет за кои се смета дека се „тргнати“ поради тоа што носеле одлуки во полза на барањата на Специјалното јавно обвинителство.
- Јас сум зачуден, да не речам фрапиран, од навредливото однесување и вокабулар од тие што се интервјуирани и од некои од новинарите или од самонаречени новинари. Подобни и неподобни судии нема, сите се судии. Никој не е привилегиран или хендикепиран доколку работи во друг оддел. Оценката е тука, во конкретниот случај на в.д. претседателот на судот, изјави Караџовски.
Тој нагласи дека бил зачуден и фрапиран од известувањето на новинарите за новиот годишен распоред на судии во Основниот суд Скопје 1.
Ова не е прв пат високи судски функционери да ги осудуваат новинарите и медиумите за начинот на кој известуваат новинарите, особено кога се критички настроени кон донесените одлуки.За прераспределбата свои изјави имаа и самите судии кои лично го искажаа незадоволството од одлуката за која сметаат дека има посебна позадина поврзана со СЈО.