Ким Џонг Ун конечно се врати од Русија по денови патување со оклопниот воз

Добивај вести на Viber

Севернокорејскиот лидер Ким Џонг Ун пристигна во Пјонгјанг во вторникот вечерта со својот оклопен воз по неколкудневно патување, со што ја заврши посетата на Русија која ќе остане „засекогаш во историјата“ на билатералните односи, објавија во средата државните медиуми.

Ким отиде со воз дома во неделата по посетата на Русија, а официјалната новинска агенција KCNA објави дека тој се вратил „со добро здравје“.

На железничката станица го пречекаа високи функционери и граѓани на Северна Кореја, нагласува КЦНА. 

Севернокорејскиот лидер изврши „бесмртни револуционерни прекуокеански активности“ во Русија кои „засекогаш ќе останат во историјата на развојот на пријателството меѓу Северна Кореја и Русија“, додаде КЦНА.

Официјалната севернокорејска централна телевизија во средата емитуваше нова 90-минутна репортажа, фокусирана на најважните моменти од патувањето на Ким во Русија и неговата средба со рускиот претседател Владимир Путин.

Патувањето и средбата со Путин ги поттикнаа стравувањата на Запад дека Москва бара да купи оружје од Пјонгјанг за конфликтот во Украина. И двете земји се под меѓународни санкции: Москва поради инвазијата на Украина и Пјонгјанг поради нејзините нуклеарни и балистички програми.

Ким помина вкупно 10 дена на своето патување во Русија, вклучувајќи го и времето на патување, објави јужнокорејската новинска агенција Јонхап, истакнувајќи дека тоа е неговото најдолго патување во странство откако дојде на власт кон крајот на 2011 година.