Кинескиот премиер вети економски раст и борба против корупцијата
Објавено во: Свет 17 Март, 2013
Кинескиот премиер Ли Кечианг денеска изјави дека обезбедувањето на економски раст ќе биде приоритет на неговата Влада и вети оти ќе се бори против корупцијата и за прашањата од интерес за државата, а повика и за запирање на кибер војната со САД.
Ли на првата прес-конференција, откако стапи на функцијата премиер, а по завршувањето на годинешната седница на Секинескиот народен конгрес, на кој беше потврдено неговото именување, ја потенцира неопходноста од реформи за да се овозможи долгорочна економска стабилност.
- Највисок приоритет е да се обезбеди одржлив економски раст, истакна Ли, повеќе пати нагласувајќи ја потребата за економска, социјална и реформа на власта.
Кинескиот премиер вети дека ќе го реформира пазарот на капитал и финансии и ќе се бори против корупцијата. Тој најави и дека централната Влада ќе ги намали платите и ќе ја замрзне потрошувачката поврзана со прекуморските патувања, резиденциите, деловните згради и новите возила.
- Широкиот спектар реформи ќе ги опфати и унапредување на еколошката контрола, намалување на загадувањето во атмосферата и зголемување на стандардите за безбедност на храната и водата, потенцира Ли.