Ќе има ли економски мерки и за матичните лекари?

Добивај вести на Viber

Сет економски мерки за да не се стави клуч на врата на ординациите бараат и матичните лекари, кои преку Здружението на лекари по општа и семејна медицина писмено се обратија до властите во земјава. Велат дека очекуваат и тие да бидат вклучени во распределбата на државна помош, бидејќи во изминатиот период имаа и дополнителен ангажман. Во нивното писмо упатено до премиерот Оливер Спасовски и министерот за здравство Венко Филипче наведуваат:

- Бараме награда за сите тимови на матични лекари кои се грижат за пациенти со Ковид-19 во домашен третман и ќе се грижат за пациенти кои прележале Ковид-19. Вредносни ваучери кои ќе можат да ги искористат за набавување на средства за лична заштитна опрема и хигиенски материјали.

Истовремено, дел од матичните лекари велат дека се незадоволни од досегашниот третман на здравствените власти, бидејќи и досега имало одринации кои добиле помош, како што се пакети со ракавици, маски, средства за дезинфекција, заштитна опрема и така натаму, а други ординации пак, сето тоа сами го набавувале. Сега очекуваат подеднаков третман кон сите.

Што се однесува, пак до капитациониот бод кои бараат да биде 90 денари по пациент, велат дека тоа е дамнешен проблем, но сакаат ветувањето да биде реализирано.

-Би било добро во овој период, на сиот ангажман што го имавме и се уште го имаме барем капитациониот бод да се зголеми. Јас лично имав двајца пациенти заразени со вирусот. Нивната состојба се следи секојдневно, водиме дневник и ги бележиме симптомите за секој ден. Се е заведено во нивните здравствени картони. Матичните лекари се првата алка во целиот синџир во здравствената заштита и понатамошниот третман на сите пациенти. Јас сум среќна, бидејќи од големиот број пациенти на кој им закажав тестирање за Ковид-19, само двајца беа позитивни. Постојано бев и се уште сум во контакт со своите пациенти. Дури и малку да се посомневав дека можеби се инфицирани со вирусот, закажував тестирање, вели д-р. Македонка Попова Спасеска од ПЗУ „Мастеса“.

Матичните лекари сметаат дека е крајно време да се реши и проблемот со луѓето кои остануваат без работа, а со тоа и без здравствено осигурување, што директно води и кон матичните лекари бидејќи остануваат без капитациониот бод.

-Тоа е долготраен проблем кој и сега е актуелен, бидејќи наеднаш голем број луѓе поради пандемијата ги загубија работните места, и автоматски матичните лекари не ја добиваат капитацијата. Ова треба системски да се решава. Не мора веднаш осигуреникот да се исклучува од системот. Јас, како матичен лекар, без разлика што не земам капитација од пациентите кои останаа без работа, ги прегледувам, не наплаќам за здравствената услуга, но проблемот е што ваквите пациенти не може да добијат упат за повисоко ниво на здравствена заштита, не може да добијат лекарства на рецепти...Лесно е да се исклучи некој од системот, но долг е процесот повторно да влезе во истиот тој систем. Процедурата е подолга. Истовремено, вината ја гледам и во самите пациенти и постојано сугерирам оние кои останале без работа веднаш да се пријават во социјално, бидејќи на тој начин го остваруваат правото на здравствена заштита. Тоа значи дека и матичните лекари имаат исплата на капитациониот бод, појаснува д-р Попова Спасеска.

По испратеното писмо од страна на Здружението на лекарите по општа и семејна медицина, премиерот Спсовски изјави дека нивните барања ќе бидат разгледани и врз основа на анализи ќе донесат одлуки.