Ќе поскапат ли струјата и природниот гас како акцизни стоки?

Добивај вести на Viber

Царинската управа готви нов Закон за акцизи во кој во одредени режими на користење струјата, природниот гас, лигнитот и коксот ќе бидат акцизни стоки. Ќе има ли нов удар врз македонската економија?

Царинската управа планира да воведе акциза на струјата, природниот гас, јагленот, лигнитот и коксот, дознава „Фактор“ од доброупатени извори. Засега не е познато за кои режими на користење на струјата, природниот гас, лигнитот, коксот се планира воведување акциза, но сигурно е дека за оние потрошувачи или корисници на овие суровини на кои се однесува воведувањето царина ќе добијат зголемување на своите трошоци. Дознаваме дека Царинската управа доставила покани до фирмите кои се во бизнисот со енергенси да дојдат на консултации за новата акциза која се подготвува да се пресметува на струја, природен гас и тврди горива.

„Фактор“ достави прашања до Царинската управа и доколку добиеме одговори ќе ги објавиме во целост.

Дознаваме дека новитетите се дел од новиот предлоз Закон за акцизите во кој во одредени режими на користење акцизни стоки ќе бидат природниот гас, електричната енергија и тврдите горива: кокс и лигнит. Сега државата наплаќа акциза на течните горива: дизели, бензини, нафта за домаќинството. Веројатно наскоро ќе почне да се наплаќа акциза и на горенаведените стоки.

Нашите извори брифираат дека струјата наменета за домаќинствата и во новиот предлог Закон за акцизи нема да се оданочува односно на таа потрошувачка државата нема да наметне акциза. Сега електричната енергија не е стока на која се наплаќа акциза. Акцизата е давачка што го полни буџетот и таа се наплаќа на стоките кои доаѓаат од увоз. Македонија нема природен гас ниту  тврдо гориво кокс што значи дека ако се точни нашите информации на овие енергенси сигурно во одредени режими на користење ќе се наплаќа акциза што значи дека ќе бидат зголемени цените на тие енергенси на нашиот пазар.

Дознаваме дека со новиот Предлог закон за акцизи Министерството за финансии ќе го добие ексклузивното право да ги утврдува висините на акцизните давачки.

Актуелниот министер за финансии Драган Тевдовски од почетокот на оваа година ја зголеми акцизата на дизел горивата, а заедно со зголеменото ДДВ на оваа стока цената на литар дизел се зголеми за 3,5 денари.