Кога Максим Димитревски ќе ја презентира програмата и тимот?

Добивај вести на Viber

Движењето што ќе го формираме ќе биде главниот носител на идната власт, во октомври ја најавуваме нашата платформа и програма, вели кумановскиот градоначалник Максим Димитриевски. 

Тој гостуваше на Телма каде кажа дека 90 отсто од неговите активности се насочени на креирање на нова програма и нов буџет за следната или за наредните три години каде што ќе бидат имплементирани постоечките програми што се на сила, наплата на средства и постигнување на повисоко ниво на заштеди.

„Во попладневните часови се посветувам на здружението „За наше Куманово” и сите останати здруженија во државата. Веќе во септември верувам ќе формираме нов субјект, политичко движење, тоа ќе зависи од сите тие здруженија за кои веќе информиравме и во октомври ќе ја најавиме нашата платформа и програма. Имаме одличен тим, којшто јавноста ќе го слушне во септември и ќе оставам простор самите тие да се откријат. Граѓаните се познати по градовите кадешто формиравме здруженија во 8 градови, тоа се луѓе од локално ниво, а во Скопје ќе ги слушнете во септември”, рече Димитриевски.

Вели дека новата влада ќе ја сочинува експерти и луѓе коишто досега немале искуство во политика.

„Не знам кој ќе победи на изборите, но знам дека движењето коешто ние ќе го формираме ќе биде главниот носител на идната власт. Ние ќе коалицираме со сите оние што ќе прифатат да потпишат една сериозна платформа, првенствено национална за македонскиот народ, а подоцна да седнеме на иста маса и реално да разговараме како тоа се креира и формира мултиетничко, а не биетничко општество во државата“, изјави Димитриевски. 

Вели дека сега имаме само една убава форма во којашто политичарите се разбираат взаемно одлично, но мултиетницизмот не функционира во суштина.