Кои два фактори го „закочија“ растот на Македонија?

Добивај вести на Viber

Намалена е прогнозата за економскиот раст на Македонија, оцени Европската комисија. 

Два факори го „закочија“ растот на земјата. 

Политичката неизвесност влијае за одложување на одлуките за инвестирање, а од планираните капитални проекти се реализираа само 23%.

Европската комисија ги намали очекувањата за раст во земјава, од 3,1% на 2,1%. Политичката состојба во земјава и слабата реализација на капиталните инвестиции се фактори за неостварливиот проектиран раст. 

Стапката на раст ќе заздравува во следните години, според ЕК, но со забавено темпо. Очекуваат идната година растот да достигне 2,8%, а дури во 2020-тата ќе изнесува 3,1%.

Растот во земјава, иако се реализира во далеку помал процент од планираното, во најголема мера е придвижен од зголемениот извоз. Комисијата очекува дека во следните две години извозот ќе продолжи да расте.

Прогнозираат зголемување на стапката на вработеност, но и на висината на платите.

Во извештајот се констатира дека иaкo јавниот и државниот долг, како процент од БДП, лани се намалиле, годинава пак е забележан раст што ќе продолжи во следните две години. ЕК прогнозира дека долгот ќе се зголеми повеќе отколку што се очекува во Владините проекции.

Очекувањата за економски раст на земјава претходно ги намалија речиси сите меѓународни институции, но и НБРМ, чија проекција за раст од 3,2% е корегирана на 2,3%.

Од ВМРО-ДПМНЕ реагираа дека Република Македонија на крајот на годината ќе има убедливо најлош раст на БДП во регионот. Велат дека од земја која беше лидер во регионот во економска политика, сега се тркаламе на дното. Тие бараат некој да понесе одговорност за лошата состојба во економијата.