Кои се најуспешните приватни болници и колку заработуваат?

Добивај вести на Viber

Најголема приватна клиничка болница е „Аџибадем Систина“, а лани најпрофитабилна била клиниката „Жан Митрев“. Во најголемите пет лани се и центарот за дијализи „Дијамед Македонија“, првата приватна општа болница „Ре-медика“ и специјалистите за ин-витро оплодување „Плодност“ од Битола.

Најголемите пет приватни болници во Македонија лани оствариле приходи кои надминуваат 80 милиони евра (кумулативно) и профит поголем од 10 милиони евра, покажуваат нивните официјални финансиски податоци. Приватните здравствени установи во нашата земја имаат висок рејтинг и солидна доверба. Граѓаните ги конзумираат нивните услуги и доколку се во можност и покрај повисоките цени ги преферираат пред услугите на државните здравствени установи.

Најголема приватна клиничка болница во земјава лани била „Аџибадем Систина“. Оваа здравствена установа нуди широк спектар на здравствени услуги. Лани остварила вкупен приход од 38,9 милиони евра и по тој параметар е најголем приватен давател на здравствени услуги на македонскиот пазар. Приходите на „Аџибадем Систина“ лани пораснале за 11 отсто во однос на 2018 година. Профитот на ова друштво лани изнесува 3,1 милиони евра и во споредба со претходната година, добивката е пониска за 24 отсто. „Аџибадем Систина“ е во партнерска сопственост на едно домашно физичко лице Нина Пијаде – Мирковска, турската здравствена компанија „Аџибадем“ и домашната компанија „Орка Холдинг“. Неодамна во рамки на „Аџибадем Систина“ беше отворена нова педијатриска болница, најголема во регионот

Клиничката болница „Жан Митрев“ е втора најголема приватна болница според остварените приходи. Лани оваа компанија остварила приход од 21,7 милиони евра што е раст за 37 отсто во споредба со 2018 година. Профитот на „Жан Митрев“ лани изнесува 4,05 милиони евра и ја прави оваа клиничка болница најпрофитабилна (според остварена добивка во апсолитен износ). Ова друштво е во сопственост на кардиологот – штипјанецот Жан Митрев.

Првата приватна општа болница во земјава Ре-медика е трета најголема приватна болница во земјава. Нејзниот приход лани изнесувал 8,3 милиони евра и тоа е за 4 отсто подобар резултат од 2018 година. Профитот на Ре-медика лани изнесува 928.000 евра и книжи пад од само 4 отсто во споредба со претходната година. Сопственик на оваа болница е семејството на познатиот бизнисмен Минчо Јорданов преку компанијата „Макмедикон“.

Диамед Македонија е најголем провајдер на услуги од областа на дијализа на бубрежни болни. Ова друштво лани остварило приход од 9,7 милиони евра што е за 7 отсто подобар резултат од 2018 година. Профитот изнесува 1,8 милиони евра и е за 2 пати поголем од претходната година. Овој центар за дијализи е сопственост на компанијата „Метрополитен Скопје“.

Најмала во групата најголеми е битолската болница за гинекологија и акушерство „Плодност“ долгогодишна успешна бизнис приказна за специјалистот на ин-витро оплодување Таше Трпчевски. Лани „Плодност“ остварила приход од 3 милиони евра што е за раст од 7 отсто во однос на 2018 година. Профитот на друштвото изнесувал 289.000 евра и бележи пад од 19 отсто во однос на претходната година.