КОЈ ПРИМИ ПИСМО, ПРЕГОВОРИ НЕМА: Еве кому пишал Трамп и што напишал

Добивај вести на Viber

Претседателот на САД, Доналд Трамп, денес испратил писма за царини до уште седум трговски партнери на САД - Филипините, Брунеи, Молдавија, Алжир, Либија, Шри Ланка и Ирак.

Според писмата на Трамп, царините за увоз од Шри Ланка, Либија, Ирак и Алжир во САД ќе бидат 30 проценти, од Молдавија и Брунеи 25 проценти, а од Филипините 20 проценти, почнувајќи од 1 август, објавува АП.

Трамп, исто така, додаде дека подоцна во текот на денот ќе објави царини за увоз од други земји.

Писмата беа објавени на социјалната мрежа „Трамповата вистина“ по истекот на 90-дневниот период за преговори, а Трамп вчера изјави дека нема да има нови продолжувања за земјите што ги примаат писмата.

Европскиот комесар за трговија, Марош Шефчовиќ, им рече на европратениците во Стразбур дека ЕУ е поштедена од зголемените царини содржани во писмата испратени од Трамп и дека продолжувањето на разговорите до 1 август ќе обезбеди „дополнителен простор за постигнување задоволителен заклучок“.

Трамп предложи царини од 20 проценти за стоките од ЕУ на 2 април, а потоа се закани дека ќе ги зголеми на 50 проценти, пред да предложи почетни царини од 10 проценти.