Кој се всели во стоковната куќа „Мост“ во скопската чаршија?

Добивај вести на Viber

Стоковната куќа „Мост“ во скопската чаршија станува универзитет. Во неа се сели Универзитетот на Југоисточна Европа (ЈИЕУ) од Тетово кој држи предавања и во Скопје. Веќе има 900 студенти, а според најавите од годинава ќе бидат воведени и докторски студии на ЈИЕУ во Скопје. Објектот го отвори ректорот Замир Дика, кој истакна дека  новата модерна зграда доликува за универзитет од третата генерација. Тој исто така информираше дека во годинава на ЈИЕУ се запишале 20 отсто повеќе студенти во споредба со минатата година . „Единствени во светот сме зашто сме основани со заеднички напори од САД и од Европската унија, кои не секогаш се согласуваат добро. Ваквото финансирање е огромно достигнување во цел свет и треба да бидете горди на тоа,“ истакна на отворањето и претседателот на Одборот на Универзитетот Денис Фарингтон. Според заменик-министерот за образование и наука, Сафет Незири ЈИЕУ се покажал успешен на национално и на меѓународно ниво, зашто овозможува студирање на неколку јазици, на повеќе од 70 студиски програми, а е опремен и со напредна технологија. Тој додаде и дека не случајно се наоѓа во објект што се викаше „Мост“ зашто ќе ги интегрира Македонците и Албанците и ќе ги обедини во нивното знаење и во желбата за наука. На првото рангирање на универзитетите во Македонија пред две години, Универзитетот на Југоисточна Европа попознат како Штулов универзитет, беше на второ од 19 места.