Која е најновата хотелиерска жртва на „корона“ кризата?

Добивај вести на Viber

Поранешната скопска хотелска гордост „Континентал“ годинава е на големо искушение. Тој е уште една голема жртва на корона вирусот кој не поштеди ниту една голема хотелиерска компанија. За девет месеци приходите од продажба на „Интернешнел Хотелс“ се пониски од 170.000 евра, а оперативната загуба надминува половина милион евра

Корона вирусот ја меле хотелиерско-угостителската индустрија и очигледно дека оваа година ќе биде период на големи и тешки искушенија за оваа услужна индустрија која има значајно учество во нашиот национален БДП.

Објавите на финансиските податоци покажуваат дека во низата по „Македонијатурист“ и охридски„Хотели Метропол“ уште една домашна хотелска компанија сериозно пострада од негативните последици на актуелната здравствена пандемија.

„Интернешнел Хотелс“ (односно некогашната скопска хотелска гордост „Континентал“ за првите девет месеци годинава има 85 отсто пониски приходи во споредба со истиот период лани, покажуваат официјалните податоци од финансиските извештаи на друштвото за периодот јануари – септември. За девет месеци некогашен „Континентал“ остварил приход од само 166.000 евра, а во истиот период лани друштвото имало приход од продажба во износ од 1,1 милиони евра.
И покрај оптимизацијата на трошоците менаџментот и на оваа хотелска компанија, како и на другите, не успеал да се справи со сите негативни последици од корона вирусот. Вонредната состојба, бројните ограничувања за јавни собири, прослави и свадби и стравот го направија своето. Менаџментот успеал оперативните трошоци да ги намали за 44 отсто и тие за првите девет месеци изнесуваат 680.000 евра. Најголема трошковна ставка се трошоците за вработените кои изнесуваат 293.000 евра и се за 26 отсто пониски од лани. Амортизацијата е 145.000 евра и е на исто ниво од лани, а трошокот за суровини и други материјали иако понизок за 61 отсто од лани сепак изнесува 128.000 евра.