КОЛЕКТИВНА ТУЖБА ПРОТИВ МЕТА - не почитувале договори и дозволиле пристап до лични податоци

Добивај вести на Viber

Инвеститори покренуваат колективна тужба против Марк Зукерберг, директор на „Мета“, компанија која е сопственик на популарната социјална мрежа Фејсбук. 

Тие го тужат сопственикот за износ од осум милијарди долари поради сомневања дека социјалната мрежа во 2018 година им дозволила на трети страни, вклучувајќи ја и „Кембриџ Аналитика“, пристап до личните податоци на корисниците.

Инвеститорите во тужбата тврдат дека Мета не ги открила целосно ризиците дека личните податоци на корисниците на Фејсбук ќе бидат злоупотребени од страна на Кембриџ Аналитика, која ја поддржа успешната републиканска претседателска кампања на Доналд Трамп во 2016 година, објави Асошиејтед Прес.

Акционерите наведуваат дека официјалните лица во Фејсбук повеќекратно и континуирано го прекршувале договорот од 2012 година со Сојузната комисија за трговија (ФТЦ), според кој Фејсбук се обврзал да престане да собира и споделува лични податоци на корисниците и нивните пријатели без нивна согласност.

Во тужбата понатаму се наведува дека Фејсбук подоцна продавал кориснички податоци на комерцијални партнери, што е директно кршење на тој договор, како и дека ги отстранил известувањата од поставките за приватност кои биле во рамките на договорот.

Поради овие настани, Фејсбук се согласи да плати казна од 5,1 милијарди долари за решавање на обвиненијата од ФТЦ. Сега, акционерите бараат Закерберг и другите да и ја надоместат на „Мета“ казната од ФТЦ и другите правни трошоци, кои тужителите ги проценуваат на повеќе од осум милијарди долари.

Се очекува судењето да трае до крајот на следната недела и ќе вклучува сведочења и од Закерберг и од поранешната извршна директорка за операции, Шерил Сандберг.