Колку пари извади „Макпетрол“ од продажба на стоки за широка потрошувачка?

Добивај вести на Viber

Од продажба на смоки, сокчиња, води и пива, сладоледи, грицки и други стоки за широка потрошувачка „Макпетрол“ лани остварил приходи од 26,93 милиони евра и тоа е повеќе за 3,19 милиони евра од 2016 година. На „Макпетрол“ можат да му позавидат и некои големи ланци супермаркети за тоа колкави приходи има од продажба на стоки за широка потрошувачка

„Макпетрол“ лани продал стоки за широка потрошувачка од рафотвите на своите бензински пумпи во износ од 1,664 милијарди денари односно 26,93 милиони евра, а тоа е раст на продажбата на такви стоки за 13,4 отсто во споредба со 2016 година. Овие приходи на „Макпетрол“ се 9,3 отсто од сите приходи од домашниот пазар на компанијата остварени во 2017 година. Поголемиот број од големите македонски ланци на супермаркети можат да му завидуваат на „Макпетрол“ затоа што од неговата споредна дејност прави приходи колку што тие прават од нивната основна дејност – малопродажба на стоки за широка потрошувачка. Еве споредба: „Макпетрол“ од својата споредба дејност на бензинските пумпи прави повеќе од една четвртина од прометот што го има најголемиот македонски ланец на големи малопродажни маркети „Тинекс“.

Колку пораснала продажбата на овие стоки лани во однос на 2016 година?

„Макпетрол“ лани продал стоки за широка потрошувачка во износ од 26,9 милиони евра и тоа е за 13,4 отсто повеќе од продажбата во 2016 година односно за 3,19 милиони евра поголем приход. Оваа ставка може да се најде во Годишниот извештај на Управниот одбор на „Макпетрол“ за 2017 година на 185 страница и таа е со назив „останати стоки“. „Макпетрол“ го натфрлил планот за малопродажна на стоки од широка потрошувачка за 13 отсто односно за речиси 150 милиони денари. 

„Макпетрол“ ја има најголемата малопродажна мрежа низ државата затоа што управува со 127 бензински станици ширум земјава. Освен тоа од пред две години „Макпетрол“ воведе картичка за стимулирање на купувачите „Верна“ која функционира на систем на добивање поени за купени горива кои потоа можат да се искористат за купување стоки за широка потрошувачка на бензиските станици на „Макпетрол“.