Кому во државата му одговaра да нема прв човек на државната ревизија?
Објавено во: Економија 17 Декември, 2018
Помина точно една година откако Собранието го објави огласот за избор на нов Главен државен ревизор. Толку време Државниот завод за ревизија нема прв човек затоа што ниту еден од предложените кандидати не беше избран. Со институцијата раководи заменик главен ревизор кој има ограничени овластувања и надлежности. Фактор се обиде да добие одговори од претседателот на Собранието Талат Џафери за тоа зошто изборот се уште не е завршен и дали е во ред ваква институција надлежна за контрола на државното трошење да биде обезглавена. Повеќе од две недели од неговиот кабинет не одговараат на прашањето. Дел од познавачите ама и луѓе кои се вработени во Државниот завод за ревизија го поставуваат прашањето каде е проблемот? Дали во дигнитетот и професионалноста на кандидатите кои се пријавиле или пак некој има интерес ова институција да нема човек кој ја раководи.
Таа е чувар на јавните пари ама и Владата не е загрижена. На прашањето како гледаат на тоа што институција клучна алка во системот е без прв човек од Владата кратко одговорија дека немаат надлежност за изборот.
„Владата на Република Македонија како извршна власт нема ингеренции во изборот на главен државен ревизор, Ве упатуваме одговорот на ова прашање да го упатите кон законодавната власт односно кон Собранието на РМ, ни одговорија оттаму.
Точно е дека надлежноста е кај Собранието, ама Владата според познавачите секако треба да е загрижена за тоа. Треба, велат нашите соговорници, да врши јавен притисок ова прашање да биде затворено.
Дел од ревизорите со кои разговаравме мислат оти додека не се избере Главен државен ревизор може да се овозможи и незаконско работење во Државниот завод за ревизија. Имено во текот на годината била извршена измена на Актот за организација и систематизација од страна на заменикот главен државен ревизор па тој се прилагодил. Инаку според членот 10 од Законот за државната ревизија, Заменикот на главниот државен ревизор нема право да врши измена на Актот на систематизација и организација на ДЗР.
Во оваа година била добиена е согласност за десетици нови вработувања или унапредувања, кои треба да се реализираат.
На интернет страницата на ДЗР и моментно има активни интерни огласи за унапредувања. Од друга страна во ДЗР во тек се неколку проекти од Европска унија и други невладини институции за подобрување на капацитетите на институцијата и други цели, а вкупниот износ на проектите надминува 2,5 мил евра.
Фактор испрати прашања за заменик Главен државен ревизор Насер Адеми меѓу кои и како гледа на тоа што не е избран нов Главен државен ревизор една година и зошто се менува систематизацијата за работа. Сепак одговори до денеска не стасаа.
Инаку Фактор ги анализираше кандидатурите на сите пријавени за Главен државен ревизор. Дел од нив имаат сертификат за познавање на англиски јазик од соседна земја. За некои имало дисциплински постапки, а има и такви кои доаѓаат од надвор и и се познати на јавноста.
А.Т.