Координацијата на политичките партии за ЈО продолжува, но датум за состанок нема

Добивај вести на Viber

Координацијата продолжува, но датум и време за состанок на работните групи на политичките партии за новиот Закон за Јавно обвинителство се уште нема.

Работните групи кои работат на новиот Закон за новото Јавно обвинителство требаше да се состанат вчера, но не се случи тоа.

Обвинителката Лиле Стефанова ги повика политичките партии и сите засегнати институции час поскоро да го донесат законот за Јавното обвинителство, за да се откочи работата на Специјалното јавно обвинителство но, исто така и работата на редовното Јавно обвинителство, да не се остава простор на криминалот.

И најголемата опозициска партија ВМРО-ДПМНЕ се отворени за преговори, но според нив по неодманешните случувања поврзани со „Рекет“, Владата требала да се откаже од барањето за пренесување на тимот на СЈО во новото Обвинителство за органииран криминал и висока корупција.

До Советот на обвинители, Обвинителството за гонење на организиран криминал и корупција испратило писмо за развојот на случајот „Рекет“, но според Советот испратените информации не биле целосни и затоа тие бараат целосни информации, или обвинителката Вилма Русковска во понеделник да се појави кај нив и сама да даде повеќе информации за предметот.

Владата пак, претстави своја верзија на нацрт-законот за ЈО кој е веќе во собраниска процедура и за нацрт-законот собраниска расправа е предвидено да има во вторник.