Короната не го запре „Макпетрол“! Колкава добивка направи најголемиот трговец на мало со дизел и бензини?

Добивај вести на Viber

„Макпетрол“ ја покажа својата конзистентност во најтешко време. И покрај тоа што короната го блокира или редуцира патниот транспорт и ги суспендира комерцијалните летови, компанијата прокнижи добивка од 1,5 милиони евра која во вакви услови вреди многу. „Макпетрол“ на домашниот пазар изгуби 20 отсто од приходите за ова полугодие, но и покрај тоа ги зголеми трошоците за своите вработени за 12 отсто до 9,4 милиони евра

Многу охрабрувачки вести за акционерите на „Макпетрол“, а воедно и општо за инвеститорите на берзата. Сепак изгледа дека најлошото помина и дека има светло на крајот од корона-тунелот иако битката ќе биде макотрпна и долга.

Најголемата македонска компанија за трговија на мало со нафтени деривати „Макпетрол“ за првите шест месеци заврши со профит од 1,5 милиони евра. Иако оваа добивка е само 24 отсто од ланскиот профит за истиот период е повредна (од морален аспект). Затоа што компанијата беше нај директно изложена на негативното влијание од корона пандемијата која удри како гром во туризмот и во транспортот – дејноста од која „Макпетрол“ остварува приходи затоа што продава деривати за задвижување на моторите на сите превозни и транспортни патни возила, а и на воздухопловите.

Вкупно за првото полугодие приходот од продажба е 128,2 милиони евра и тој е помал за 23 отсто од истиот период лани. Клучниот удар доаѓа во вториот квартал. Приходот на „Макпетрол“ под влијание на сите негативни корона ефекти и вонредната состојба паѓа до 50 милиони евра, а лани во исто време бил 92,3 милиони евра. Од друга страна пак, компанијата годинава ја почнала одлично затоа што во првиот квартал успеала да оствари приход од 80 милиони евра што е за 1,9 милиони евра подобар резултат од првите три месеци во 2019 година. Подетално информациите се достапни во новото многу прегледно и содржајно Образложение кон финансиските извештаи кое „Макпетрол“ го доставил до Македонската берза и е јавно достапно на СЕИ НЕТ.
Значајно е да се истакне дека голем удар, очекувано, врз приходите има продажбата на млазното гориво заради мерките со кои беа приземјени комерцијалните авионски летови ширум светот, во земјава и во нашето опкружување. Токму заради тоа приходите на „Макпетрол“ се намалија драстично од 9,5 милиони евра лани до 3,2 милиони евра годинава што е пад за 65 отсто.

Но и покрај негативните ефекти компанијата успеала да оствари оперативна добивка од 770.000 евра што е само една четвртина од оперативната добивка во истиот период лани. Многу значајно за истакнување е тоа што во ова тешко време за пазарно делување „Макпетрол“ ги зголемил трошоците (а со тоа и грижата за своите вработени). Така за првите шест месеци за своите вработени „Макпетрол“ исплатил 9,4 милиони евра што е за 12 отсто повеќе од истиот период лани.

Благодарејќи на позитивната разлика меѓу финансиските приходи и финансиските расходи на компанијата (околу 700.000 евра) „Макпетрол“ доаѓа до нето добивка по оданочување во износ од 1,46 милиони евра.