КОШНИЧКАТА ПОСКАПЕ: ССМ вели со ова темпо до крајот на годината три минимални плати ќе бидат малку

Добивај вести на Viber

Поскапува синдикалната кошничка. Се повеќе пари се потребни за основните потреби на едно семејство. 

Синдикалната кошничка за мај е зголемена за 180 денари. Според ССМ, вредноста на Синдикалната минимална кошница за мај 2021 година изнесува 34.156,00 денари.

Само за последните два месеци таа е зголемена за повеќе од 400 денари. 

„Доколку продолжи со вакво темпо на зголемување во просек од 200 денари месечно до крајот на годинава нема да бидат доволни ни три минимални плати за покривање на основните потреби на едно четиричлено семејно домаќинство“, велат од Сојузот на синдикати на Македонија.

Според ССМ, зголемувањето на трошоците е неоправдано имајќи во предвид дека цената на нафтата со која се правдаат газдите и ја користат како оправдување за зголемување на цените во 2018 година изнесувала 63,50 денари во месец јуни, 60.00 денари во 2019 година, 50.00 денари во 2020 година, а овој месец е 60.50 денари. Тоа, велат од ССМ, значи дека во 2020 година во време на пандемија предизвикана од коронавирусот, морало да се донесе и Уредба со законска сила за определување на највисоките цени  на одделни производи во трговијата на големо и трговијата на мало, заради енормното зголемување на цените на штета на граѓаните, а за профит на газдите.

„Ова покажува дека неоправдано е да се зголемуваат цените, ако знаеме дека цената на нафтата е пониска од пред почетокот на пандемијата имајќи предвид дека никој од газдите кога цената го имаше најниското ниво во изминатите 10 години не ги намали цените, туку остваруваа огромни профитина грбот на работниците“, се вели во денешното соопштение од ССМ.

Има раст од три проценти на трошоците за живот во мај годинава, споредено со минатата година. 

Податоците деновиве ги објави Државниот завод за статистика. Раст има кај свежиот зеленчук и овошје, маслото, газираните пијалоци, месото, како и течните горива, медицинските услуги, обувките и информатичката опрема, додека намалување има кај шеќерот, џемот, медот, чоколадата и кондиторските производи, гасот за домаќинствата, моторните возила, велосипедите и книгите.

foto freepik