Добивај вести на Viber
Косовските државјани кои сакаат да влезат во Македонија мора да платат по две евра патна такса, уште пет евра се наплаќа за автомобил и десет ева за влез на камион или автобус. Оваа мерка стартуваше од синоќа на полноќ. Косовските државјани кои ја минуваат границата и доаѓаат во Македонија се револтирани, но револтирани се и македонските камионџии кои натоварени со макеоднски производи веќе неколку дена не можат да влезат на косовска територија, а косовските цариници ги враќаат назад поради ембаргото што земјата го воведе за Македонија.
Косово со нова закана до Македонија. Косовските власти, најавуваат дека целосно ќе ги спуштат рампите за сите македонски производи, а не само за одредени, како досега. Ваквата нова закана им била упатена на македонските власти, откако земјава воведе патна такса за косовските државјани кои сакаат да влезат во земјава.
Министерката за трговија на Косово, Мимоза Кусари, вели дека е можно проширување на листата на стоки кои ќе бидат забранети за увоз на Косово од Македонија.
„Ние инсистираме ова да биде чисто економско прашање. Владата на Косово прави нови консулатции за да се види кој ќе биде следниот чекор. Секако дека таквите форми на реакција не можат да и прават ултиматум на косовската влада. Во спротивно и ние можеме да ја прошириме забранетата листата на стоки што од Македонија доаѓаат во Косово“, изјави Кусари за косовските медиуми.
Владата на Косово нема намера да воведе реципрочни мерки за македонските државјани.
„На тоа ниво ние нема да се спуштаме. Но, на Македонија ќе и покажеме дека ако тие продолжуваат на таков начин да ги третираат косовските државјани, тогаш загубите директно ќе ги почувствуваат во нивната економија. Реципрочни мерки за слободното движење на граѓаните нема да има, затоа што ние сме свесни дека од таквата одлука најголема штета ќе имаат Албанците од Македонија и останатите кои доаѓаат во Косово, секако и Македонците“, изјави за косовските медиуми Кусари.
По најавите дека Косово целосно ги спушта рампите за сите македонски производи, Македонија сега размилсува за дополнителна, нова мерка. Неизвесно е до каде ќе оди оваа трговска војна меѓу двете држави, ниту дали македонска делегација утре ќе оди на преговори со косовските власти.