Добивај вести на Viber
Министрите за енергетика на седумте земји-членки на ЕУ кои беа вклучени во проектот за изградба на гасоводот Јужен тек денеска на состанокот во Брисел се согласиле да се свртат кон други алтернативни патишта за увоз на гас, каков што е Јужниот или Транс-атлантски коридор, кој ги поврзува Азербејџан и Италија.
Ова практично може да значи дефинитивен крај за гасоводот Јужен тек, за кого Русија најави дека ги прекинува плановите за изградба. Ова е исходот од денешниот состанок на претставниците на Бугарија, Романија, Италија, Австрија, Словенија, Грција и Хрватска со потпретседателот на Европската комисија задолжен за енергетската унија Марош Шефчович.
Унијата остана категорично на својот став - Јужен тек ќе може да се гради само ако во целост се усогласи со правилата на ЕУ.
„Ги повикав министрите на разговор за овој гасовод многу пред рускиот претседател Владимир Путин да ја објави одлуката за прекин на изградбата“, вели Шефчович.
Енергетскиот проект беше особено важен за земјите од Јужна Европа, кои со него добиваа алтернативен и посигурен коридор за увоз на природен гас.