КУЌА, ЛИВАДА И ОПЕЛ МЕРИВА: Што се поседува новиот претседател на Советот на јавни обвинители

Добивај вести на Viber

Куќа со помошна просторија, ливада, едно возило, заштеда ама и кредит има во имотната состојба новиот претседател на Советот на јавни обвинители Антонио Јолевски.

Во анкетниот лист кој Јолевски го доставил до Државната комисија за спречување на корупцијата во 2020 година кога беше избран за член на Советот, Јолевски пријавил дека поседува куќа со помошна просторија и двор како личен имот во Битола. Куќата вреди над два милиони. Има и ливада вредна еден милион која се наоѓа во Трн. Возилото опел мерива од 2007 година му вреди 120.000 денари. На денарската штедна книшка во Халк банка поседува 360.000, но не пишува дали се денари или евра. Исто така валутата не е наведена во сумата за износот на кредитот кој го подигнал, а кој е во вредност од 600.000.

Јавниот обвинител Антонио Јолевски, на функцијата член на СЈО дојде од Основното јавно обвинителство на Битола. Во 1983 година се вработил во Окружен суд Битола, каде бил приправник и раководител на писарницата. Од 1996 распореден во Апелациониот суд Битола како стручен соработник и судски советник, а од 2002 година како раководител на сектор – секретар на судот. Во 2003 година е избран за заменик Јавен обвинител во Основното јавно обвинителство Битола. Во 2012 година е избран за Основен јавен обвинител на Основното јавно обвинителство Битола. Од 2018 како јавен обвинител во ОЈО Битола. Во 2020 година е избран Член на Советот на јавните обвинители на Република Северна Македонија.

А.Т.