Лиза Шаќири до Груби: Не не омаловажувајте, ние Албанците сме кадарни за работа
Објавено во: Македонија 22 Септември, 2020
Ние не сме ни глупи ни необразовани ни прости, а фала богу здрави и прави и конкурираме на трудовиот пазар еднакви и со Македонци и со Германци и други и тука и во странство, вели Лиза Шаќири, правник, сопруга на познатиот пеач Бени Шаќири. Во нејзиниот пост кој се споделува на фејсбук таа е револтирана од најавата на Артан Груби, првиот вицепремиер кој најави субвенции за вработувања етнички Албанци во приватни компании и барањето да има двојазичност и во овие фирми за кои синоќа зборуваше Билал Касами од Беса.
Таа додава дека Албанците не се ништо помалку стручни од ниедни други, а стручната подготвеност е индивидуална и секој според заслугите во приватни фирми.
„Тоа што вие како партија можете да направите е барем мало делче на кадарот што го вработувате да не биде делегиран од вашата партија туку да им се даде еднаква шанса на сите Албанци без разлика на тоа има или нема вложено труд за партијата или поседува или не партиска книшка, вели Шаќири.
Таа објаснува дека ретко кој дипломиран Албанец не знае македонски.
„Двојазичност не можете да наметнете кај приватни сосптвеници па ни македонски јазик не можете да наметнете кај албански или странски приватни фирми што работат тука. Во приватниот сектор веќе постои двојазичност секаде каде тоа носи екстра профит. Почнувам од берберот што ми е комшија и зборува освен својот македонски јазик и албански па се до поголеми фирми. Конечно престанете да не омаловажувате и прикажувате како помалку квалитетен кадар од другите. Оваа ваша евтина популистичка и кобајаги патриотска игра придонесува да изгледаме уште поинфериорни од тоа што им се причинуваме на Македонците, вели Шаќири.