Македонците најчести, но и најскржави туристи во Грција!

Добивај вести на Viber

Македонците се најдоа први на листата на Грчката комора на хотелиери, според бројот на странски туристи кои во август месец ја посетиле Грција. Имено, според истражувањето кое го спровела комората, 473.819 Македонци, во август влегле во Грција, со 1.826.851 ноќевања, оставиле 65,8 милиони евра. Македонецот, при влез во Грција трошел 139,1 евро, а за ноќевање 36,1 евро, објави Канал 5 телевизија. Според податоците од грчката Комора на хотелиери посетителите од нашата земја се најбројни, но и со најмали трошоци. Во споредба со нас, Албанците на пример кои се на 6 место, имаат речиси 15 пати помала посетеност, но при секој влез оставале 409,6 евра, односно 130,6 за секое ноќевање. На листата која се однесува на влез во Грција по земјен пат, односно со автомобил или автобус веднаш зад Македонија е Србија, а потоа следат Турција, Германија, Бугарија, Албанија,Романија, Русија и Украина. Според истражувањето на сојузот на хотелиери од Солун, пак, Македонија е спомената како една од 20 земји со најголемо зголемување на посетите на Солун, во однос на лани, за периодот јануари – август 2013. За првите 8 месеци од годината, Македонија е на 15 место со 11.266 ноќевања, односно 10,79 проценти повеќе во споредба со лани истиот период.