МАКЕДОНИЈА Е ЛИДЕР ПО БРОЈОТ НА ПУШАЧИ: Луѓето се откажуваат од цигарите само ако мораат
Објавено во: Македонија 20 Април, 2023
Многу анализи покажуваат дека Македонија е лидер во регионот и пошироко во Европа по бројот на пушачи. Според истражувањето на „Аналитика тинк-тенк“ објавено неодамна, во земјава 48,4 отсто од луѓето пушат, додека во европските земји стапката е далеку пониска или просекот во Европската Унија(ЕУ) е 29 проценти. Мажите почесто посегнуваат по цигарите. Односот на пушење цигари меѓу мажи и жени е 57,9 отсто наспроти 39 отсто. Граѓаните кои сакаат да се откажат од оваа штетна навика, можат да побараат стручна помош во Центрите за јавно здравје во државата. Но, бројот на оние кои се обратиле во установата е мал. Оттаму велат дека луѓето бараат начин да се откажат од пушењето најчесто поради здравствени проблеми.
„Во период од 01 јануари до 31 март 2023, вкупниот број на советувани граѓани во Советувалиштата за откажување од пушење кои се наоѓаат во 10-те Центри за јавно здравје изнесува 17. Според светските искуства, потребно е да помине најмалку една година од почеток на третманот за откажување од пушење, за да може пушачот да се прогласи за непушач и да се потврди дека успеал да се откаже од пушење. Најчеста причина за откажување од пушење е нарушеното здравје. Најбројна возрасна група на оние кои што сакаат да се откажат од пушење е од 50 до 60 години“, велат од Институтот за јавно здравје.
Направивме анкета со граѓани, при што дел од нив раскажуваат дека пушат уште од тинејџерските години и имаат „долг стаж“ како пушачи.
„Пушам од 15-16 години, односно цели 25 години. Не сум се обидувала да се откажам и не планирам тоа да го направам освен ако не добијам препорака од лекар. Една кутија цигари ми трае два дена“, вели Тања.
Самите пушачи објаснуваат дека е тешко да се откажат од цигарите. Има и такви кои направиле пауза, но потоа пак им се вратиле на цигарите. Велат потребен е силен карактер за да може пушачот да прекине со пушење.
„Пушам долго време, цели 20 години. Не сум се обидела да се откажам од цигарите, не сум ни помислила на тоа. Во моето семејство немам многу пушачи, а на работа има доста пушачи“, рече Силвана.
Оние кои никогаш не запалиле цигара во животот, порачуваат дека секој треба да си внимава на своето здравје и дека е страшно тоа што малолетниците пушат.
„Јас не пушам, дома никој не пуши. Лично моето мислење е дека не треба да се пуши, штетно е. Слушаме и лекарите што кажуваат и какви совети ни даваат. Не сум пушела никогаш и не планирам“, вели Светлана, пензионерка.
Македонија е меѓу првите 10 земји во светот по распространетост на пушење и по вкупниот број на испушени цигари дневно по пушач. Загрижува и пасивното пушење во земјава. Мал е процентот на домови во Македонија во кои не се пуши. За споредба, во Шведска пушат само 8,7 отсто од населението, а во Грција и во Бугарија по 27 отсто.
Сања Атанасовскаfoto freepik.com