МАКЕДОНСКА РЕАЛНОСТ: Ниту две минимални, ниту една просечна плата не може да ја покрие минималната кошничка

Добивај вести на Viber

Расте минималната потрошувачка кошничка во земјава, при што таа не може да биде покриена ниту со две минимални плати кои се движат околу 15.000 денари, ниту со една просечна македонска плата која е нешто над 27.000 денари.

Потрошувачката кошница во октомври изнесувала 33.704 денари, соопшти  Сојузот на синдикатите на Македонија (ССМ).

Кристина Ампева од Здружението „Гласен Текстилец“ од Штип вели дека само се констатира висината на потрошувачката кошничка, но ништо не се презема за зголемување на платите. Нагласува дека трошоците за живот постојано растат. Двајца вработени во текстилниот сектор не можат да си ја дозволат оваа потрошувачка кошничка која чини скоро 34.000 денари, а при тоа станува збор само за основни трошоци.

„Тоа се основни минимални трошоци, а во светот се зборува за плата за живот. Освен храна, сметки, облека, обувки, каде ни се тука пари за култура, за здравството сега во време на корона кога ни требаат повеќе средства и кога многу луѓе или останаа без работа или се со намалени плати? Треба да зборуваме за плата достојна за живот, како во другите земји каде освен стандардните трошоци се пресметуваат и заштеди“, вели Ампева.

Социологот Милева Ѓуровска вели дека за оваа тема треба многу повеќе да се говори, затоа што минималната и просечната плата се во голем расчекор со потрошувачката кошничка. Таа додава дека и високо образованите кадри во земјава со години стагнираат со платите.

„Имаме релативна и апсолутна сиромаштија, и во 21 век треба да ги користиме сите цивилизациски придобивки. Таа релативна сиромаштија можеби не опфаќа само 4 отсто од населението, но другите слоеви се туркаат во тотална или апсолутна сиромаштија. Сега во овие услови државата е во една незавидна положба и луѓето имаат разбирање, сфаќаат дека треба да се преживее, тие се солидаризираат, но ова треба да се реши со една културна дискусија и на еден цивилизиран начин“, објаснува Ѓуровска.

Таа додава дека ако не се преземат мерки, во иднина може да се случи и 50 отсто од населението да се соочи со сиромаштија, што ќе биде поразително. Според неа, потребна е поголема синдикална активност за да нешто се смени, и освен текстилните работници, треба и другите да го кренат својот глас.

Во кошничката, исхраната и пијалоците учествуваат со 14.092,64 денари, домувањето со 10.812,82, хигиената со 2.388,61, а превозот со 2.469,16 денари.

За облека и обувки се потрошиле по 2.157,26 денари, за култура 1.066,79, додека за одржување на здравјето вкупно 716,91 денари.

Просечната месечна нето-плата, за август 2020 година, изнесуваше 27.535 денари.

Во државата најсиромашни се семејствата со повеќе деца, но и оние со четири члена, односно двајца родители со две деца.