Македонската ракометна репрезентација оди на Светско првенство

Добивај вести на Viber

Македонската ракометна репрезентација оди на претстојното Светско првенство 2025, коешто ќе се одржи од 14 јануари до 2 февруари. Ова беше соопштено на прес-конференцијата којашто се одржа во просториите на управната зграда на Телеком денеска, со почеток од 11:00 часот.

Македонски Телеком продолжува да го поддржува македонскиот спорт и застанува покрај ракометната репрезентација и за време на претстојното Светско првенство. На прес-конференцијата се обрати Главниот извршен директор на Телеком, Никола Љушев, којшто им посака среќа и успех на репрезентативците во нивните настапи на СП. Се обратија и претседателот на РФМ, Живко Мукаетов, секретарот на Федерацијата, Филип Милошевски, како и селекторот Кирил Лазаров во придружба на ракометарот Филип Кузмановски во улога на претставници на репрезентацијата.

„Телеком е верен поддржувач на македонскиот ракомет и ни претставува чест и задоволство што нашето партнерство со Ракометната федерација продолжува веќе осма година по ред.  Во име на целата компанија сакам да им посакам многу среќа на репрезентативците и на селекторот Лазаров на претстојното првенство. Кога нашиот тим учествува на меѓународни натпревари, целата нација се обединува зад него, што создава чувство на единство и припадност. Направете нѐ горди на СП 2025!“, изјави Никола Љушев, Главниот извршен директор на Македонски Телеком.

Македонски Телеком соопшти и дека во пресрет на СП ќе доделува дресови од репрезентацијата преку Magenta Moments. На тој начин, вистинските љубители на ракометот ќе можат да ја бодрат нашата репрезентација во националните бои, чувствувајќи се како дел од тимот којшто патува на првенството.

„За успешно првенство и добри резултати, важно е да имаме и поширока поддршка, не само од федерацијата туку  и од успешни компании и секако од целата нација. Имавме максимално добри услови за работа и подготовка, имаме млад тим којшто е желен да се докажува и да надигрува. Посакувам одлични резултати и да останеме обединети и горди на она што го правиме. Со години сме учесници на големи натпреварувања, имаме искуство, но и сплотен тим, и слободно можам да ви ветам дека ќе гледате убав ракомет од македонските ракометни репрезентативци“, изјави нашата ракометна легенда и актуелен селектор на репрезентацијата, Кирил Лазаров.

Светското првенство во ракомет оваа година има три земји-домаќини: Хрватска, Данска и Германија. Македонската репрезентација ќе ги одигра натпреварите од Групата Д во хрватскиот град Вараждин, каде што најпрво ќе ги одмери силите со Унгарија на 15 јануари, два дена подоцна ќе игра против репрезентацијата на Холандија, а на 19 јануари ги очекува третиот и последен натпревар против Гвинеја.

„Морам да упатам големи честитки до момците коишто се изборија за пласманот на Светското првенство, вкупно деветто во нашата историја. Се надевам дека уште еднаш ќе ја израдуваат домашната јавност со храбра игра и добро ќе се покажат на Светското првенство. Голема благодарност до Македонски Телеком, којшто останува партнер на РФМ на патот кон успехот и со неговата лојалност поставува пример како една голема организација треба да застане во поддршка на спортот и на општеството во целост“, додаде претседателот на РФМ, Живко Мукаетов.