Маричиќ за падот на ЕУ-ентузијазмот во анкетите: Граѓаните не се против, туку само се разочарани

Добивај вести на Viber

Вицепремиерот за европски прашања Бојан Маричиќ за падот на ентузијазмот кај граѓаните во анкетите за поддршка на евроинтеграциите, вели дека не станува за противници на идејата, туку за голем број на разочарани проевропски настроени граѓани.

„Разочарани од тоа што се случувало во изминативе неколку години, а поврзано со блокадите со коишто се соочивме, разочарани затоа што сè уште немаме точен датум кога ќе станеме членка на Европската Унија. Разочарани сигурно и поради темпото на реформите“, рече Маричиќ на денешниот настан за промоција на проектот „Медиумите за ЕУ“.

За да се промени перцепцијата на граѓаните за процесот на преговори и за ЕУ, според вицепремиерот, клучни ќе бидат токму медиумите, граѓанското општество и политичките партии.

„Процесот на евроинтеграции, особено со новата методологија, стана и политички процес, кој за жал кај нас сè почесто се политизира и се злоупотребува за дневна политика, што секако влијае на ставовите на граѓаните за ЕУ. Затоа граѓаните треба да бидат добро информирани за ЕУ и заеднички да правиме напори да се продлабочи дебатата за преговорите со ЕУ и за сите позитивни промени и економски можности кои ги носи членството“, истакна Маричиќ.

Покрај тоа, голема улога, според него, играат и дезинформациите со кои се поткопува проевропското расположение.