МЕДИУМИТЕ ВО ГАНА ПИШУВААТ ДЕКА НИВНИТЕ МЛАДИ ЌЕ ОДАТ НА ПЕЧАЛБА ВО СРБИЈА: Српските власти тврдат дека се работи за „злонамерно толкување“

Добивај вести на Viber

Веста дека Србија би можела да издаде работни дозволи за граѓаните на Гана предизвика остри реакции кај северниот сосед. 

Министерот за надворешни работи на Србија, Марко Ѓуриќ, изјави дека тврдењата за договорот со Гана се „целосна измислица“ и „уште една манипулација насочена кон предизвикување социјални тензии“. Ѓуриќ додаде дека тоа е „злонамерно толкување“ на изјавите на министерот за надворешни работи на Гана, Самуел Окуџет Аблаква, и истакна дека е вистина дека Србија и Гана развиваат пријателски и корисни односи, но дека не е постигнат конкретен договор за масовно увоз на работници.

Но, во Гана локалните медиуми објавуваат дека преговорите со Србија се во напредна фаза и дека се очекува потпишување на Меморандум за разбирање, што би го отворило патот за работно ангажирање на млади луѓе во Србија. Според министерот Аблаква, Гана се надева дека ќе добие значителен дел од планираните 100.000 работни дозволи што Србија има намера да ги издаде оваа година.

Партијата на центарот на Србија (СЦСР) потсети дека, според официјалната статистика, околу 27.000 луѓе ја напуштаат Србија годишно – претежно млади и образовани – и дека владата не нуди системски решенија за да го спречи овој тренд.

„Младите луѓе заминуваат затоа што немаат безбедност, перспектива или чувство дека општеството ги цени. Додека ја напуштаат земјата, владата планира да увезува работна сила од Африка. Наместо да се грижи за сопствените граѓани, владата се свртува кон демографски инженеринг“, соопшти СЦСР. 

Иако Ѓуриќ тврди дека Србија со години издавала работни дозволи на странски државјани – речиси 80.000 во 2024 година – критичарите истакнуваат дека овој потег има сериозни последици за социјалната структура и работничките права во земјата.