Медведев: Киев да смисли подобар план за развој наместо да ја обвинува Русија

Добивај вести на Viber

Украинскирте власти не успеаа да смислат подобар план за развој од анти – руската реторика, но официјална Москва нема да реагира на овие провокации, напишал рускиот премиер Дмитриј Медведев во текст објавен во денешниот број на весникот „Независимаја Газета“. Рускиот премиер во текстот истакнал дека Русија, спротивно на тоа, ќе продолжи да ги поддржува граѓаните на соседна Украина имајќи предвид дека најтешките времиња за украинската економија допрва доаѓаат, пренесува агенцијата „Итар Тасс“. „Ние во Русија сме загрижени поради ваквите збиднувања во Украина како што сме загрижени и за сопствените проблеми, но им помагаме на оние кои што ќе ја прифатат нашата помош и покрај злобните смешкања“, напишал рускиот премиер. Тој додал и дека искрено жали што претставниците на украинската елита ниту предложиле, ниту примениле други стратешки програми за развој на земјата. „Без оглед на тоа какви инсинуации ни испраќаат, ние немаме право да одговориме на тие провокации, ниту да заборавиме дека на другата страна од границата живеат луѓе кои ни се блиски по дух, култура, менталитет, луѓе чија судбина секогаш ќе биде важна за нас“, додал Медведев. Премиерот на Русија истакнал дека Украина за само една година доживеала длабока општествена поделба, енормен економски пад, изливи на радикализам кој вклучува истакнување на нацистички симболи, како и воена акција на својата територија против сопствените граѓани.